புகைப்படம் – திரை விமர்சனம்

வாசகர்கள், சக பதிவர்கள் அனைவருக்கும் இனிய மனம் நிறைந்த புத்தாண்டு வாழ்த்துக்கள்

நம்மளையும் ரவுடியாய் சேர்த்து எழுதி பெருமை படுத்திய தினமணி பத்திரிக்கைக்கு நன்றி..நன்றி

கொடைக்கானலில் படிக்கும் இன்ஜினியரிங் காலேஜ் மாணவர்களின் வாழ்கையை சுற்றி வலைய வரும் கதை. முற்றிலும் புதுமுகங்கள் நடித்து வெளி வந்திருக்கும் ப்டம். தியேட்டரில் முதல் காட்சி பூராவும் படத்தில் சின்ன சின்னக் கேரக்டர்களில் நடித்தவர்கள் முதல் கதாநாயகன் வரை எல்லோரும் இருந்தார்கள்.

கொடைக்கானல் இன்ஜினியரிங் காலேஜில் படிக்க வரும் பையன்கள், பெண்கள் என்று மொத்தம் ஏழு பேரின் நான்காண்டு வாழ்க்கையை விவரித்திருக்கிறார்கள். பெண்கள் அழகாய் இல்லை என்பதற்காகவே வேறு டிபார்ட்மெண்டை மாற்றிக் கொண்டு வரும் ஹீரோ, அடுத்ததாய் வந்து சேரும் ஸ்கூல் மேட் நந்து, தெலுங்குகார ரெட்டி பெண், அவளின் ப்ரெண்ட் சீனியர் பெண், எப்பப்பார் குடித்துக் கொண்டும், தண்ணியடித்து கொண்டும் சடாமுடி ஜானி, அப்பாவியாய் வந்து சேரும் கிராமத்து பையன் என்று பல நிலையுள்ள பையன், புதிதாய் வந்து சேரும் ஹெ.ஓடியின் மளையாள பெண் என்று இவர்களிடையே ஏற்படும் நட்பு, காதலை பற்றிய படம்.

சீனியர் பெண் கதை நாயகன்
படம் ஆரம்பித்து பத்து நிமிடம் வரை இவர்களின் நட்பு ஏற்படும் காட்சிகளுக்காகவே போனாலும் பெரிதாய் இண்ட்ரஸ்ட் இல்லை என்றே சொல்ல வேண்டும். அதிலும் ஹீரோ கேரக்டரும் அவனின் நண்பன் நந்து கேரக்டரும் தாங்கள் செலக்ட் ஆகியிருக்கும் டிபார்ட்மெண்டில் பெண்கள் சரியாக இல்லை என்பதால், வேறு டிபார்ட்மெண்ட்க்கு மாறி கொள்வதெல்லாம் கொஞ்சம் ஓவர் என்றே தோன்றுகிறது. புதிதாய் வந்து சேரும் கதாநாயகி, கிராமத்து அரை குறை இங்கிலீஷ் பேசும் பையன் என்று கொஞ்சம் கொஞ்சமாய் களை கட்டுகிறது. ஒவ்வொரு கல்லூரியிலும் நாங்கள் தான் சிறந்த கேங் என்று சொல்லி திரியும் ஒரு கூட்டம் கவலையில்லாம இருக்கும் அது போல இவர்கள் அலைய. திடீர்னு ஜானி மட்டும் எப்போது பாய்ஸுக்கும் கேர்ஸுக்கும் ஒத்து வராது என்று சொல்லிக் கொண்டே அலைபவன், சதா தண்ணி அடித்துக் கொண்டும், தம் அடித்துக் கொண்டும், தூங்கிக் கொண்டும் அலைவது ஏன் என்று தெரியவில்லை. இவனுக்கும், காலேஜ் சீனியரான பெண்ணுக்கும் உள்ளே ஓடும் காதல், நைஸ்.
இடைவேளை வரை பெரியதாய் ஏதும் புதுசாய் இல்லாத காட்சிகளாகவே நகர்கிறது. ஆங்காங்கே லேசாய் புன்முறுவல் செய்ய வைக்கும் காமெடியை தவிர, ஹீரோ, ஹிரோயினுக்குள் ஏற்படும் காதல் காட்சிகள், புரபசருக்கும், ஆபீஸ் ஸ்டாப் நிலிமாவுக்கும் இடையே ஏற்படும் காதல் காட்சிகள் வரை எல்லாமே ஏற்கனவே பார்த்த காட்சிகள், படத்துக்கு பெரிய மைனஸ் என்றே சொல்ல வேண்டும். இரண்டாவது பாதியில் இவர்களுக்குள் பிரிவு ஏற்பட்டவுடன் தான் கொஞ்சம் சூடு பிடிக்கிறது. அப்படியே பிடித்தாலும் எதை நோக்கி போகிறது என்ற ஒரு கேள்வி போய்க் கொண்டுதானிருக்கிறது நம் மந்தில். கடைசி பத்து நிமிட காட்சியில் தான் மொத்த படத்தின் உயிர்நாடியை பிடித்து வைத்திருக்கிறார்கள். அதில் தான் புகைப்படமாய் மனதில் நிற்க வைக்க முயன்றிருக்கிறார்கள்.
கதாநாயகனை விட, அவனின் நண்பனாய் வரும் குரு என்ற்ழைக்கப்படும் ஜானியின் நடிப்பு கச்சிதம், அதே போல் அவனை டேய் அண்ணா என்று அழைக்கும் தெலுங்குகார பெண்ணும் க்யூட். கதாநாயகி பெரியதாய் அழகாய் இல்லாவிட்டாலும் இம்ப்ரஸிவ். அதே போல கிராமத்து இளைஞனாக நடித்திருக்கும் நடிகரின் நடிப்பும் மனதில் நிற்கிறது. க்ளைமாக்ஸ் காட்சியில் கதாநாயகன் ஸ்கோர் செயய முயற்சி செய்கிறார். அவரின் ஸ்கூல் நண்பனாக வரும் நந்துவுக்கு பெரிதாய் முக்யத்துவம் இல்லாவிட்டாலும், நிச்சயம் ஸ்கீரின் ப்ரெசென்ஸில் கண்ணில் நிற்கிறார். இப்படத்தின் மூலம் ஜானியும், தெலுங்குகார பெண்ணும், நந்துவும் நிச்சயம் ஒரு ரவுண்ட் வருவார்கள் என்று தோறுகிறது.

தெலுங்குகார ரெட்டி பெண் கிராமத்து தடாலடி ஆங்கிலம்பேசும் பையன்
இசை கங்கை அமரன் ஆங்காங்கே நெருடல் இல்லாத பாடல்களை அளித்திருக்கிறார். ”உடைக்கணும், உடைக்கணும் அஞ்சாறு பாட்டில்களை: பாடல் பழைய இளையராஜாவின் பாடலை ஞாபகப்படுத்தினாலும் செம குத்து. அதே போல் சித்ரா, எஸ்.பி.பியின் இது கனவோ இல்லை நிஜமோ பாடலில் மெலடியிலும் ஒரு கம்பேக் என்றுதான் சொல்ல வேண்டும்.
குடிகார குருவும், சீனியர் பெண்ணும்
16எம்.எம் கேமராவில் எடுக்கப்பட்ட படம். சரியான டிஜிட்டல் இண்டர்மீடியேட் செய்யவில்லையோ என்னவோ, படம் ம்ழுவதும் க்ரெயின்ஸ் இருக்கிறது. டிஜிட்டல் கேமராவிலேயே எடுத்திருக்கலாம் அட்லீஸ்ட் நல்ல குவாலிட்டி கிடைத்திருக்கும். கொடைக்கானலில் படப்பிடிப்பு நடத்தியும் புண்ணியமில்லாமல் போய் விட்டது என்றே சொல்ல வேண்டும். சுப்ரமணிய புரம், மாயாண்டி குடும்பத்தார் ப்டம் எல்லாமேஎ சூப்பர் 16 எமெம்மில் எடுக்கப்பட்டு டி.ஐ செய்யப்பட்டதுதான். இவர்கள் வெறும் 16 எம்.எமில் எடுத்து இருக்கிறார்களோ.. என்ன செய்வது பட்ஜெட் என்ற ஒன்று இயக்குனரின் கைகளை கட்டித்தான் போடுகிறது. அதையும் மீறி ஒளிப்பதிவாளர் விஜய் ஆம்ஸ்ட்ராங் தன் முத்திரையை பதித்துள்ளார் என்றே சொல்ல வேண்டும்.
நந்து
ராஜேஷ்லிங்கம் இயக்குனர் செல்வராகவனின் உதவியாளர். திரைக்கதையில் தெலுங்கு ஹாப்பிடேஸின் தாக்கம் நிறைய, வாய்ஸ் ஓவரில் படம் ஆரம்பிப்பதிலிருந்து ஆங்காங்கே ஹாஸ்டல் காட்சிகள், காலேஜ் ரேடியோ, கதாநாயகன், நாயகியின் காதல், ரொம்பவும் சில்லியான விஷயத்துக்காக பிரிவு என்பது போன்றா காட்சிகள் படம் முழுக்க. அதையும் மீறி க்ளைமாக்ஸ் காட்சியில் மனதில் நிற்கும் படியான ஒரு விஷயத்தை வைத்திருக்கிறார். அது தான் படத்தை தூக்கி நிறுத்துகிறது. பல காட்சிகளில் திரும்ப திரும்ப பட்ஜெட் விஷயத்தால் ஒரே இடத்திலேயோ, அல்லது ஒரே விதமான காட்சிகளிலோ அலைந்து கொண்டிருப்பது போரடிக்கிறது. நடிகர்களீன் ப்ரெஷ்னெஸ், திரைக்கதையில் இல்லை என்றே சொல்ல வேண்டும்.
அசோக்கும், ஷாலுவும்
கடைசி க்ளைமேக்ஸ் காட்சி ஒன்றை மட்டும் போது என்று நினைத்துவிட்டார் போலிருக்கிறது. இம்மாதிரியான க்ளைமாக்ஸுக்கு முன்னால் அவர்களிடையே நடக்கும் காட்சிகளில் ஒரு இயல்பு வேண்டாமா.? அவர்களின் வாழ்கையின் ஒரு பகுதியை நம் கண் முன் ஓட வேண்டாமா?. திரைக்கதையில் நுணுக்கமாய் செதிக்கியிருந்தால் நெகிழ்ந்து போய் உருக வைத்திருக்கும். அதில் மிஸ் செய்ததால் க்ளைமாக்ஸ் கொடுப்பது அதிர்ச்சி மட்டுமே. அதே போல க்ளைமாக்ஸ் காட்சிகளின் வசனங்கள் கொஞ்சம் ஓவர்தான், திரும்ப திரும்ப ஒரே விஷயத்தை பற்றி பேசிக் கொண்டிருக்கிறார்கள். இதையெல்லாம் மீறி பட்ஜெட்டில் இம்மாதிரியான படங்கள் வருவது நம்பிக்கைக்குறியதாகவே இருக்கிறது.

புகைப்படம் - இன்னும் கொஞ்சம் சரியா எக்ஸ்போஸ் செய்திருக்கலாம்
டிஸ்கி:
நிறைய படங்களை போட்டிருப்பதன் காரணம் என்னவென்றால் மொத்தமாய் ஏழு எட்டு புதுமுகங்கள் நடித்திருக்கும் ப்டத்தில் அவர்களின் ஒரிஜினல் பெயர்களும், திரைப்பட கேரக்டர் பெயர்களும் மாறியிருக்க வாய்ப்பிருக்கிறது. நிச்சயம் இதில் வரும் இரண்டு மூன்று கேரக்டர்களுக்கு நல்ல வாய்ப்பு கிடைத்தால் மிளிர்வார்கள் என்ற நம்பிக்கை இருக்கிறது.

Technorati Tags: திரை விமர்சனம்,tamil film review

தமிலிஷிலேயும், தமிழ்மணத்துலேயும் குத்துங்க எஜமான்.. குத்துங்க

---

Post a Comment