புத்தக சந்தையும்.. இன்ன பிற கதைகளும்

புத்தக கண்காட்சி சந்தை 30ஆம் தேதி ஆரம்பித்தது. இரண்டு நாட்களாய் போகணும், போகணும் என்று கிளம்பி போக முடியவில்லை. கடைசியாய் மூன்றாம் தேதி பிக்ஸ் செய்து நான், தண்டோரா, அகநாழிகை என மூன்று பேராய் கிளம்பினோம். என் பைக்கை தண்டோராவின் ஆபீஸில் போட்டு விட்டு வாசுவின் காரில் சென்றடைந்தோம்.

பெரிதாய் கூட்டமில்லை. ஆனால் தண்டோரா நேற்றை விட கூட்டம் என்றார். இருக்கலாம் எனக்கு முன்னால் ரெண்டு நாள் அங்கே போயிருந்தார். உள்ளே சென்று கண்காட்சியை சுற்றி பார்க்கலாம் என்று கிளம்ப எத்தனிக்கையில் வாசு நேராக அவருடைய புத்தகம் விற்கும் கடைக்கு போய் பார்க்கலாம் என்று நேராய் போக போகிற வழியில் கிழக்கை தாண்டிய போது பாராவும், பாலபாரதியும் கிழக்கு பின்னால் உள்ள வழியில் தரையில் உட்கார்ந்து பேசிக் கொண்டிருந்தார்கள். வாய்யா உட்காரு.. என்றழைத்த பா.ராவிடம் இதோ ஒரு ரவுண்ட் அடித்து விட்டு வருகிறேன் என்று சொன்னதன் பின்விளைவு பின்னால் தெரிந்தது.

அண்ணன் தண்டோராவின் கவிதை ஒன்றை பதிவர் மாதவராஜ் அவரது கவிதை தொகுப்பில் வெளியிட்டிருக்க, அதை தேடி வம்சி பதிப்பகத்துக்கு போய் வாங்கி தன் கவிதை வந்திருக்கிறதா என்று பார்த்துவிட்டு, ”நாலு வரி போயிருச்சு” என்றார் ஒரு கவிஞரின் ஆதங்கத்துடன்… நானும் ஒரு புத்தகம் வாங்கலாம் என்று புத்தகத்தை திறந்து படித்தால் என் எண்டர் கவிதைகள் தரத்திற்கு கொஞ்சம் கூட ஈடு இல்லாமல் இருந்ததால் வைத்து விட்டு வந்துவிட்டேன்.( நமக்கு பிரியவில்லை..)

நேராக அங்கிருந்து இடது பக்கம் திரும்பினால் நம்ம சாருவும், நர்சிமும் நின்றிருக்க, நேராய் அங்கே போய் நானும் கலக்க, சாருவும், நானும், நர்சிமும் பேசி கொண்டிருக்கையில் அப்துலலா வர, அப்படியே நான், தண்டோரா, வாசு, அத்திரி, வெண்பூ என்று ஒரு ஜமா சேர்ந்தது. வாசுவும் நானும் சாருவிடம் ஒரு சந்தேகம் என்று கேட்டோம். “ அது எப்படி நீங்களும் ஜெயமோகனும் ஒவ்வொரு வருஷம் டிசம்பர், ஜனவரியில் மட்டும் சண்டை போட்டு கொள்கிறீர்கள்? ஏதாவது உள்குத்து, மார்கெட்டிங் இருக்கிறதா..? என்று கேட்டதும் சிரித்தபடி.. அப்படியெல்லாம் ஒன்றும் இல்லை என்றார். எஸ்.ராவிடம் கொஞ்சம் நேரம் பேசிக் கொண்டிருந்துவிட்டு, அட்லீஸ்ட் இந்த கடையிலாவது ஒரு புத்தகம் வாங்கலாம் என்று கடைக்குள் போக, அப்துல்லா சில புத்தகங்களை செலக்ட் செய்ய, நான் வா.மு. கோமுவின் ‘சாந்தாமணியும் இன்ன பிற காதல் கதைகளும்” என்கிற நாவலை மட்டும் வாங்கி வெளியே வர, அதற்குள் வாசு, சாரு, நான், அப்துல்லா, தண்டோரா, வெண்பூ, அத்திரி எலலோரும் ”ரவுண்ட்” அடிக்க கிளம்ப, புத்தக கண்காட்சிக்கு போய்விட்டு ஒரே ஒரு ஸ்டாலை மட்டும் பார்த்துவிட்டு வந்த ஆட்கள் நாங்களாய்தான் இருப்போம்.

கிளம்புவதற்கு முன் எஸ்.ராவுடனும், சாருவிடனும் போட்டோ எடுத்துக் கொண்டு நாங்கள் கிளம்ப, ரவுண்டில் சாருவிடம் பேச ஆரம்பித்து மிக இன்ட்ரஸ்டாய் போனது அன்றைய மாலை. சாருவின் எழுத்தை பற்றியும் அவரின் ராஸலீலாவில் வரும் ஃபங்குலாவின் கேரக்டரை பற்றியும், ஹைதராபாத் முஸ்லிம் பெண்ணை பற்றியும் பேசிக் கொண்டே பொழுது ஏற, சாரு உடனடியாய் ஏர்போர்ட் போக வேண்டிய கட்டாயத்தால் நான், தண்டோரா, சாரு, வாசு மட்டும் கிளம்பி அவரை ஏர்போர்ட்டில் ட்ராப் செய்துவிட்டு நானும் தண்டோராவும் குரோம்பேட்டை நலாஸில் ஆப்பம், சாப்பிட்டு விட்டு, வண்ணத்து பூச்சியை பார்த்துவிட்டு அரசு பேருந்தில் கிளம்பினேன். கிளம்பி அஞ்சு நிமிஷத்தில் எல்லாம் நட்ட நடுவில் பஸ் பிரேக் டவுனாகி நிற்க கண்டக்டர் ரோடில் அடுத்து வரும் பஸ்ஸை எல்லாம் நிறுத்த முயற்சி செய்து ஏதும் நிற்காமல் ஆட்டோ பிடித்து வந்து சேர்ந்தேன். அன்றைய கண்காட்சி பர்சேஸ் சாந்தாமணி மட்டும் தான்.



சரி அடுத்த நாள் ஞாயிற்றுக்கிழமையாதலாம் உள்ளே நுழையும் போதே கூட்டம் அம்மியது. கமல் வேறு பேச வந்திருந்தார். நிஜமாகவே நல்ல கூட்டம். நேரே உள்ளே நுழைந்ததும், வழியில் பதிவர் காவேரி கணேஷ் எதிர்பட, முதல் ஸ்டாலில் இருந்து சுற்றி வரலாம் என்று முடிவெடுத்தோம். பெரும்பாலான கடைகளில் பெரிதாய் ஏதும் கூட்டமில்லாவிட்டாலும், நடைபாதையில் கூட்டம் இடறிக் கொண்டுதானிருந்தது. கூல் டிரிங்க்ஸ் கடையிலும், சிறுவர் ப்த்தக கடைகளிலும் கொஞம் கூட்டம் இருந்தது. வந்த கூட்டத்தில் பெரும்பாலும், பீச்சுக்கு பதிலாக புத்தக கண்காட்சிக்கு போகலாம் என்று வந்திருந்த ஜோடிகள் அதிகம். புத்தக கடை எதையும் பார்க்காமல் ஒருவர் இடுப்பை ஒருவர் உரசிக் கொண்டு டிசம்பர் குளிருக்கு இதமாய் அணைத்துக் கொண்டு பராக்கு பார்த்த படி போக, அதில் ஒரு ஜோடியின் ஆண் எதிரே வந்த ஒரு பெண்ணின் அபரிமிதத்தை விழி விரிய பார்க்க, திடீரென உச்சஸ்தாயியில் ‘ஆ’வென கத்தினான்.

ஒவ்வொரு பதிப்பகமாய் வளைய வருவோம் பின்னால் அதில் செலக்ட் செய்யும் புத்தகதை நோட் செய்து கொண்டு வாங்குவோம் என்று நினைத்து ஒவ்வொரு கடையாய் ஏறி இறங்க.. நக்கீரனில் தலைவன் சுஜாதாவின் நீதி கதைகள் என்று ஒன்றை பார்ததும், இது நம்ம கடையில இல்லியே என்று முதல் போணி செய்தேன். அங்கிருந்து கிளம்பி மெல்ல கிழக்கு பக்கம் வந்தபோது நல்ல கும்பல், கிழக்கின் எல்லா ஸ்டாலிலும் ஒரளவுக்கு,அதுவும் புத்தகம் வாங்கும் கும்பல் புத்தகங்களை ப்ரவுஸ் செய்து வாங்கிக் கொண்டிருந்தது. நான் பார்த்ததில் ராஜீவ் காந்தி கொலைவழக்கு பரபரப்பாக இருந்தது. இந்த புத்தகத்தை பற்றி ஏற்கனவெ நண்பர்க்ள் பேசியிருந்ததால் அதையும், என்னுடய கடையிலிருந்து ஒரு உயிர் நண்பன் சுஜாதாவின் ‘மீண்டும் ஜீனோ” லவட்டி கொண்டு போய்விட்டதால் இன்னொரு காப்பி வாங்கினேன். அப்படியே உயிர்மைக்கு போனால் வாசலிலேயே எஸ்.ரா வரவேற்றார். அவரிடம் சிறிது நேரம் பேசிக் கொண்டிருந்துவிட்டு, புத்தகங்களை அலச, மீண்டும் கண்ணில் பட்டது தலைவனின் ‘கடவுள்களின் பள்ளத்தாக்கு” என்கிற கட்டுரை புத்தகம். நண்பர் காவேரி கணேஷ் எனக்கு அந்த புத்தகத்தை பரிசிட்டார். நன்றிண்ணே..

திரிசக்தியில் நண்பர் பதிவர் நிலா ரசிகனின் புத்தகம் விற்பனைக்கு வைத்திருந்தார்கள். திரிசக்தி கடைக்குள் நுழைவதற்கே ஏதோ சாமியாரின் மடத்துக்கு நுழைந்தது போல் ஒரு பெரிய உம்மாச்சி படத்தை வைத்திருந்தார்கள். விகடனில் காவேரி கணேஷ் எஸ்.ராவின் தேசாந்திரியை வாங்கி அவரிடம் கையெழுத்து வாங்கினார். கூட வந்திருந்த அவரின் நண்பரும் அதே புத்தகத்தை வாங்கியிருக்க, அதற்கு பதிலாய் அதே எஸ்.ராவின் துணையெழுத்தை வாங்கிக் கொள்கிறேன் மேற்கொண்டு ஆகும் பணத்தை கொடுக்கிறேன் என்று சொன்னாலும். அவர்கள் மறுத்துவிட்டார்கள். இத்தனைக்கும் கடையில் பெரிய கூட்டமில்லை. இம்முறை சுமார் நானூறுக்கும் மேற்பட்ட கடைகள் இருதாலும் பெரும்பால கடைகள் இரண்டு பக்கமும் ஓபன் நிலையில் இருக்கும் கடையாதலால் கடை குறைவு தான் என்று நினைக்கிறேன். நான் பார்த்த வரை ஓரளவுக்கு கல்லா கட்டிய கடைகள் பத்ரியின் கிழக்கும் அதன் மற்ற நிறுவனங்களும், உயிர்மை, விகடன், அப்புறம் காலச்சுவடில் தான். காலச்சுவட்டில் இரண்டு வாங்கினா ஒன்று ப்ரீ என்று வியாபாரம் செய்தார்கள். எல்லா புத்தகங்களும் ஆளூக்கொரு தலையணை செஸ் புத்தங்களை வெளியிட்டிருக்கிறார்கள் கிட்டத்தட்ட ஆயிரம் ரூபாய் விலையில். கையில் ஏந்தி படித்தால் நிச்சயம் ஆர்னால்டின் ஆர்ம்ஸில் கால் பாகமாவது வ்ந்துவிடும் என்று தோன்றுகிறது.

இங்கிலீஷ் பேசிக் கொண்டு தமிழ் புத்தகம் தேடும் தகப்பனிடம் “வொய் டோண்ட் தே ஹேவ் இங்கிலிஷ் புக்ஸ்? “ என்று கேட்ட எட்டு வயது பெண். எத்தனை நேரம்தான் கடை கடையா அலைவீங்க? ஒரு நா என்னோட ஷாப்பிங்குக்கு அலைஞ்சிருக்கீங்களா..? என்று புலம்பும் இளம் மனைவி, “போனவருஷம் வாங்கினதையே இன்னும் படிக்கலை, தூசி படிஞ்சி கிடைக்கு இதுல இன்னமுமா? என்று அங்கலாய்க்கும் மிடில் ஏஜ் மனைவி. கோலபுக் கடைகளில் தீவிரமாய் புத்தகத்தை திறந்து பார்த்து புத்தகத்தில் இருக்கும் புள்ளிகளை மனதுக்குள் வெற்று வெளியில் காற்றில் புள்ளி வைத்து பழகும் பேரிளம் பெண், தமிழ் கம்ப்யூட்ட்ர் சாப்ட்வேர் விற்கும் கடைகளிலும், இங்கிலீஷில் அடித்தால் தமிழில் தெரிவதை ஏதோ குறக்களி வித்தை பார்ப்பது போல வேடிக்கை பார்க்கும் கூட்டம், ஜீன்ஸ் போட்டு தீவிர இலக்கியவாதிகளுடன் பேசிக் கொண்டிருக்கும் திருநங்கைகள், தடி தடியான புத்தகங்களை எடுத்து பார்த்துக் கொண்டே “என்னமா எழுதியிருக்கான் பாரு” என்று திருவிழாவில் தொலைந்த குழந்தையாய் விழிக்கும் காதலியிடம் பில்டப் செய்யும் காதலன், லீசி ஜூஸும், காப்பியுமாய் குடித்துவிட்டு பாத்ரூம் வழி தேடியலையும் கூட்டம், இரண்டு புத்தகம் வாங்கி பிளாஸ்டிக் பையில் போடும் போது அந்த மாதிரி கட்டை பை தர மாட்டீங்களா? என்று கேட்க சொன்ன மனைவியை அக்னியாய் எரிக்கும் கணவன், இந்த இடத்தை ஆசீர்வதிக்க வந்தவள் என்கிற பாடிலேங்குவேஜில் எங்கு பார்த்தாலும் தெரியும் அழகு பெண்கள், தங்கள் அழகை பற்றி அக்கரையில்லாத மிக அழகு பெண்கள், கருப்பாய், மாநிறமாய், குண்டாய், ஒல்லியாய், குட்டையாய், பெரும்பான்மை ஆண்கள் கூட்டத்தில் பச்சக் என்று ஒட்டிக்கொள்ளும்….. புத்தக கண்காட்சி வழக்கம் போல இருக்க, இன்னைக்கு திரும்பவும் போகணும்னு….

Technorati Tags: Book Fair,புத்தக கண்காட்சி

---

Post a Comment