கொத்து பரோட்டா –01/03/10

இரவு சுமார் 11.45 இருக்கும் நானும் “அண்ணே” நண்பரும், படம் பார்த்துவிட்டு டிநகர் பஸ்ஸ்டாண்ட் அருகில் நின்று கொண்டு பேசிக் கொண்டிருந்த போது ஒரு போலீஸ் குவாலிஸ் வேன் வந்து நிற்க, சரி இரவு நேரத்தில் பேசிக் கொண்டிருக்கிறோமே? எங்களை துரத்துவதற்கு முன் கிளம்புவோம் என்று நினைத்த போது, வேனிலிருந்து வாட்டர் பாக்கட் மூட்டைகள், வாட்டர் கேன்கள் எல்லாம் அருகில் இருந்த கடைக்கு சப்ளையானது அதை இறக்கியவர் ஒரு போலீஸ் கான்ஸ்டபிள். போலீஸ் வேன் எப்போது லோட் அடிக்கும் வேன் ஆனது? என்று வேன் போனதும் விசாரித்த போது “அவங்கதாங்க இந்த ஏரியாவுல இருக்கிற எல்லா கடைக்கும் தண்ணி பாக்கெட், வாட்டர் கேன் எல்லாம் சப்ளையர்ங்க. பெரிய ஆபீசர் ஒருத்தர் சொந்தமா ப்ளாண்ட் வச்சிருக்காராம் அதனால. வேற இடத்தில வாங்கினா பிரசச்னை. ஆனா ரேட்டெல்லாம் கரெக்டாத்தான் போடறாங்க” என்றார். வாழ்க ஜனநாயகம்.
#################################################################
தமிழ் சினிமாவை காப்பாற்ற யாருக்கும் வீடு, நிலம் எல்லாம் கொடுத்து தூக்கி நிறுத்த தேவையேயில்லை. டிக்கெட் விலையை அரசு நிர்ணையித்த விலையில் கொடுத்து, பார்வையாளர்களை ஏதோ அடு மாடு என்ற நிலையில் வைத்து ஒரே நாளில் தியேட்டர் கொள்ளளவை விட அதிக பேரை 30 ரூபாய் டிக்கெட்டை 150 ரூபாய் வரை ஏற்றி, ஏசியும் போடாமல், ஏன் என்று கேட்டால் இஷடமிருந்தா பார் இல்லாவிட்டால் வெளியே போ என்று மிரட்டும் காரியத்தை இவர்கள் கைவிட்டாலே நிச்சயம் தமிழ் சினிமா வாழும். திருச்சியில் எந்த ஒரு பெரிய படத்துக்கும் குறைந்த பட்சம் 150-200 ரூபாய் இல்லாமல் படம் பார்க்க முடியாது. ஏன் சிறிய படமான தமிழ் படம் ரிலீசான நாள் அன்று 50ரூபாய்க்கு விற்ற டிக்கெட்டுகள், ஹிட் என்றானதும், 80 ரூபாய் ஆகிவிட்டது. ஞாயமாய் பார்த்தால் அரசு நிர்ணையித்த விலை சென்னைக்கே ஒரு சிங்கிள் ஸ்கிரீன் தியேட்டருக்கு அதிகப்படியான டிக்கெட்டின் விலை ரூ.50தான். ஆனால் அதை சென்னையிலேயே சிட்டி தியேட்டரை தவிர மற்ற எந்த தியேட்டரிலும் கடை பிடிப்பதில்லை. சிட்டி தியேட்டர்கள் கூட தமிழ் படம் ரிலீஸ் செய்யும் போது குறைந்த பட்ச டிக்கெட்டே கொடுக்காமல், ப்ளாட்டாக 50 ரூபாய்க்கும் 70 ரூபாய்க்கும் விற்கிறார்கள். இப்படி தியேட்ட்ர் உரிமையாளர்களும், விநியோகஸ்தர்களுமே சினிமாவை அழித்து கொண்டிருக்கிற நிலையில் சட்டத்தை அமுல் படுத்தினால் தனக்கு விழா எடுக்க யாரும் இருக்க மாட்டார்கள் என்று  தலைவர் அட்ஜெஸ்ட்மெண்ட் செய்து கொள்கிறாரோ..?
##################################################################
சாப்பாட்டுக்கடை
பரோட்டா என்றாலே நம் எல்லோருக்கும் மதுரை, தேனி, பார்டர் கடை என்று தான் ஞாபகம் வரும்.
அப்படி ஒரு பிரபலமான கடை தான் ராஜாக்கிளி ஓட்டல். பரோட்டா, சால்னாவுக்கென்றே புகழ் பெற்றது. அவ்வளவு மெல்லீசான, வாயில் போட்டால் உருகி கரையும் பரோட்டாவை நான் தமிழகத்தில் சாப்பிட்டது கிடையாது. அவ்வளவு சுவை. சிவகங்கை மாவட்டம் திருப்பத்தூர் பஸ்ஸ்டாண்டுக்கு வெளியே, இருக்கும் ஒரு சிறிய ஓட்டல் தான் ராஜாக்கிளி. அவ்வூருக்கு வரும் யாராக இருந்தாலும் ஒரு வேளை உணவு ராஜாக்கிளி பரோட்டாவாகத்தான் இருக்கும். நீங்கள் அவ்வூர் பக்கம் போகும் போது நிச்சயம் மிஸ் செய்யாதீர்கள்.
##################################################################
இந்த வார குறும்படம்
Validation.. ஒரு பதினைந்து நிமிடத்தில் ஒரு அழகான காதல் கதையை, ஒரு செய்தியோடு கொடுத்திருக்கிறார்கள். யார் தான் பாராட்டுக்கு மயங்காதவர். எல்லோரும் எங்கேயும் எப்போதும் யாராவது ஒருவரின் அங்கீகாரத்துக்கோ, பாராட்டுதலுக்கோ, நம் மனம் தேடிக் கொண்டுதானிருக்கிறது. அதையே வேலையாய் செய்யும் ஒருவன், மிகவும் புகழ் பெற்று விட, டிரைவிங் லைசென்ஸுக்கு புகைப்படம் எடுக்கும் ஒரு அழகிய பெண்ணை சந்திக்கிறான். ஆனால் அவள் சிரிக்கவே மற்ந்தவள். அவளின் மேல் காதல் கொண்டு மீண்டும், மீண்டும் அவளை சிரிக்க வைக்க முயன்று தோற்றுப்போய், இவன் நொந்து, இருந்த வேலை போய் திரிய, மீண்டும் அதிலிருந்து மீண்டு வரு போது அவன் காதலியை சந்திக்கிறான். முடிவு என்ன? படம் கொஞ்சம் நீளமானாலும் நிச்சயம் பாருங்க.16 நிமிஷம்தான். ஒரு அழகான மனதை கொள்ளை கொள்ளும் காதல் கதை உங்களுக்காக.. லிங்க் கொடுத்து என் ரசனை மேல் நம்பிக்கை வைத்த பதிவர் செந்திலுக்கு நன்றி.

##################################################################
இந்த வார காமெடி
போனவாரம் பிள்ளையும் கிள்ளி விட்டு தொட்டிலையும் ஆட்டியவர், இந்த வாரம் குழந்தை கிள்ளியதையும் பொருட்படுத்தாமல் “போதா.. வெண்நெய்” என்று நடிக்காவிட்டால் ரேஸ் கார் ஓட்ட போய்விடுவேன்  என்று சொல்லிவிட்டதால், வேறு வழியில்லாமல், விழாவில் நடந்தது குழந்தை கன்னத்தில் வைக்கும் கருப்பு திருஷ்டி பொட்டு என்றும், நாம் கலை குடும்பத்தினர் எல்லாம் எலலவற்றையும் மறந்து அறிக்கை விடாமல், ஏற்கனவே விட்டதை மறந்து ஒன்றாய் வேலை செய்யுங்கள் என்று சொல்லியிருக்கிறார். இதை போன வாரமே ஏதும் செய்யாமல் விட்டிருந்தால் இப்படி கேவலப் பட்டிருக்க வேண்டாம்.  வேற வழி பேரப் புள்ள படத்துக்கு கால்ஷீட் வாங்கியிருக்கிற நேரத்துல படத்துக்கு ஏதாவது பிரச்சனை வந்திருச்சுன்னா.. பொருளாதாரம்  முக்கியமில்லையா..? இவ்விஷயத்தில் தங்கள் நிலையை விட்டுக் கொடுக்காமல் தங்கள் கருத்துக்களுக்காக ஆணித்தரமாய் நின்ற அஜித், ரஜினி இருவரையும் பாராட்டுவோம்.
###################################################################
இந்த வார தத்துவம்
அதிர்ஷ்டத்துக்கு ஒரு பழக்கம் யார் தன்னை மதிக்காம, தன்னை நம்பாம இருக்கிறானோ அவனிடம் தான் போய் உதவும். அதானால அதிர்ஷத்தை நம்ப பக்கம் திருப்பணுமின்னா பெரிய மேட்டரே இல்லை. அதிர்ஷ்டத்தை நம்பாம, உங்களை நம்புங்க. நீங்க் பாட்டுக்கு உங்க வேலைகளை பாருங்க அதிர்ஷடம் உங்களை தேடிவரும்.
##################################################################
ஏ ஜோக்
ஒரு ஆஸ்ப்பிட்டலின் டொனேஷன் பிரிவில் ஒரு ஆணும், பெண்ணும் க்யூவில் நின்றிருந்தார்கள், ஆணிடம் பெண், நான் ப்ளட் டொனேட் செய்ய வந்திருக்கிறேன் ஒரு முறைக்கு 500 ரூபாய் தருகிறார்களாம்.  நீ ? என்று கேட்க, அதற்கு அவன் “தான் விந்தணு கொடுக்க வந்திருப்பதாகவும் அதற்கு 1500 தருகிறார்கள் என்றான். சில மாதங்கள் கழித்து அதே டொனேஷன் செண்டரில் ஆண் அந்த பெண்ணை பார்க்க ‘என்ன பிளட் டொனேஷனா.? “ என்று கேட்க, அதற்கு பெண் வாயை திறக்காமல் ”ம்ஹும்..ம்ஹும்” என்றாள்
##################################################################

Technorati Tags: kothu parotta,கொத்து பரோட்டா,ராஜாக்கிளி

கேபிள் சங்கர்

---

Post a Comment