இசையெனும் ‘ராஜ’ வெள்ளம்-5

இளையராஜாவின் இசையை பற்றி எழுதப் போனால் இத்தோடு முடிந்தது என்று முடிக்க முடியாது. போய்க் கொண்டேயிருக்கும். முக்கியமாய் பாடல்களை பற்றி எழுத ஆரம்பித்தால் அவ்வளவுதான். இளையராஜாவின் சூப்பர் ஹிட் பாடல்களுக்காகவே ஓடிய மொக்கை படங்கள் நிறையவே இருக்கிறது. இன்றளவில் நடக்கும் எவ்வளவோ டேலண்ட் ஹண்ட் போட்டிகளில் முதன்மையாக தங்கள் சங்கீத திறமைகளை முன்னெடுத்து வைக்க பாடப்படும் பெரும்பாலான பாடல்கள் இளையராஜாவின் பாடல்களே. வேற்று மொழியில் நடத்தப்படும் போட்டிகளிலும் இதே நிலைமைதான்.

ஒரு படத்தில் எல்லா பாடல்களும் அருமையாக வந்திருந்து பெரிதாய் பேசப்படாத படம் பற்றிசொன்னோமானால் அதில் “இன்று நீ.. நாளை நான்” படத்தை சொல்லலாம். சி.ஏ.பாலன் என்கிற எழுத்தாளர் மாலைமதியில் எழுதிய நாவலை, மேஜர் சுந்தர்ராஜன் இயக்கினார். அடல்ட்டரியை மையப்படுத்தி இருக்கும் கதையில் எல்லோருமே போட்டி போட்டு நடித்திருந்தாலும், அக்காலக்கட்டத்தில் இம்மாதிரியான கதைகள் ஒரு விதமான ஒவ்வாமை இருந்திருக்க வேண்டும் இல்லாவிட்டால் மிக அருமையான பாடல்கள் இருந்தும் பெரிதாய் போகாத பட லிஸ்டில் இப்படம் வந்திருகாது.

சுலக்‌ஷணா, சிவகுமார், லஷ்மி, ஜெய்சங்கர் ஆகியோர் நடித்திருக்கும் இப்படத்தின் கதை என்னவென்றால், எப்போது அரசியல், அரசியல் என்ற்ய் அலையும் அண்ணனுக்கு, மகாலஷ்மியாய் லஷ்மி மனைவியாய் வர, அவர்களுக்குள் செக்ஸ் நடக்காமல் இருக்க, அரசியல் தோல்வியால் அண்ணன் குடிக்கு அடிமையாகி இறக்கிறார். தம்பிக்கு சுலக்‌ஷனாவை திருமணம் செய்து வைத்து அழகு பார்க்கும் அண்ணிக்கும், தம்பிக்கு ஒரு வீக்கான நேரத்தில் தொடர்பு ஏற்பட்டுவிட, அதன் பிறகு நடக்கும் விஷயங்களே படம். மிகவும் அழுத்தமாய் சொல்லப்பட்ட இப்படத்தில் ஆரம்ப பாடல்கள் காட்சியிலேயே ராஜா தூள் கிளப்ப ஆரம்பித்துவிடுவார்.

“காங்கேயம் காளைகளே” என்று ஆரம்பிக்கும் பாடல், அதன் பிறகு அண்ணன் திருமணத்தில் சுலக்‌ஷனாவும், சிவகுமாரும் பாடும் போட்டி பாடலும், சுலக்‌ஷனா கர்ப்பம் தரித்ததும், “மொட்டு விட்ட சின்ன கொடி” பாடலும். சூப்பர் ஹிட்டான “பொன்வானம்” பாடலையும் மறக்க முடியுமா..?

இதே “பொன்வானம்” பாடல் ட்யூனையே மீண்டும் என்னுயிர் கண்ணம்மா படத்தில் உபயோகப்படுத்தியிருப்பார் இளையராஜா.. அந்த பாடலிலும் லஷ்மி தான் நடித்திருப்பார்.

****************************************************************

கேபிள் சங்கர்