உத்தமபுத்திரன்

தனுஷ், ஜவஹர், விவேக், தமிழ் சினிமாவின் சிறந்த லூசுப் பெண் ஜெனிலியா மற்றும் இருபதுக்கும் மேற்பட்ட தமிழ் சினிமாவின் பிரபல், பிரபலமில்லாத நடிகர் நடிகைகள் என்று குழாமிட்டு வெளிவந்திருக்கும் படம். ஏற்கனவே தெலுங்கில் ஹிட்டானதால், ஏன் எதற்கு என்று கேள்வி கேட்காமல், சுடச்சுட வாங்கி ரீமேக்கியிருக்கிறார்கள். இம்மாதிரியான ரீமேக்குளை செய்யும் போது ஒரு விஷயத்தை யோசிக்க வேண்டும், அங்கே அந்த படத்தை நடித்தது யார்? அங்கே அப்படம் ஹிட்டானதற்கான காரணம் என்ன? நேட்டிவிட்டி எந்த அளவிற்கு நமக்கு ஒத்து வரும் என்பதை எல்லாம் யோசித்திருந்தால் ஒரு பதினைந்து கோடி மிச்சமாயிருக்கும்.

பாக்ய்ராஜ் தலைமையில் உள்ள ஒரு பெரிய கூட்டு குடும்பத்தில் உள்ள தன் முறை பெண்ணுக்கு அவனுடய காதலனுடன் சேர்த்து வைத்ததால் வீட்டை விட்டு தனியே இருக்க வேண்டியதாகி போய்விடுகிறது தனுஷுக்கு. இதற்கு இன்னொரு பிரச்சனை தன் நண்பனின் காதலிக்கு வேறு இடத்தில் திருமணம் செய்து வைக்கப் போகிறார்கள் என்றதும் அப்பெண்ணை கடத்துகிறார்கள். ஆனால் கல்யாண மண்டபம் மாறியதால் மணப் பெண்ணும் மாறிவிட, செய்வதறியாது நிற்கும் நேரத்தில். மணப்பெண் தனக்கு அந்த கல்யாணத்தில் இஷ்டமில்லை என்று தான் புதுக்கோட்டையில் உள்ள தன் மாமா வீட்டிற்கு போக வேண்டும் என்று சொல்ல, இதனிடையே இருவருக்கும் காதல் வர, ஜெனிலியாவை தன் வீட்டிலேயே தனுஷ் தங்க வைக்க, இவர்களுக்கு திருமணம் செய்து வைக்கலாம் என்று குடும்பமே நினைக்கும் போது ஜெனிலியா கடத்தப்படுகிறார். காரணம் ஜெனிலியாவின் சொத்துக்காக இரண்டு மாமன்களுக்கிடையே லடாய். இரண்டு பேருக்கும் ஒருத்தருக்கு ஒருத்தர் ஆகாது. இருவரையும் சமாளித்து தனுஷ் எப்படி ஜெனிலியாவை அடைகிறார் என்பதை நீட்டி முழக்கி இரண்டேமுக்கால் மணி நேரம் சொல்லியிருக்கிறார்கள்.
முதல் பாதி முழுவதும், தனுஷ், ஜெனிலியா, மற்றும் தனுஷ் குடும்பட்தினர் என்று ஒரே பாசக்காரக் குடும்பமாய் போவதால் ஒன்னும் பெரிசா சொல்றதுக்கில்லை. ஜெனிலியா வீட்டுக்காரங்களிடம் விவேக்குடன் தனுஷ் சேரும் போது தான் கொஞ்சம் ரிலாக்ஸ்டான மூச்சே வருகிறது. விவேக் வழக்கமான வசனக் காமெடியிலிருந்து மெல்ல ஆக்‌ஷன் காமெடிக்கு வந்திருக்கிறார். அதிலும் தனுஷ் செய்யும் உட்டாலக்கடி தில்லாலங்கடி வேலையை பார்த்து ஃபீல் செய்யும் போதெல்லாம் நெஞ்சம் மறப்பதில்லை மியூசிக் வரும்போது நிச்சயம் சிரிக்காமல் இருக்க முடியாது.

தனுஷ் குடும்பத்தில் ஒரு கும்பல் என்றால். இந்த பக்கம் ஜெனிலியா மாமன் குடும்பத்தில் ஒரு நடிகர் கும்பல். எல்லார் பெயரையும் சொல்லி முடிப்பதற்குள் தாவூ திர்ந்துவிடுமாதலால் முடிஞ்சா தியேட்டல படம் பார்க்கும் போது தெரிஞ்சிக்கோங்க.. இந்த குடும்பத்தை ஏதோ கவுண்டன் குடும்பம் என்று சொல்லி ஒரு மாதிரி நோகடிச்சிருக்காங்க.. உக்கார முடியல. டிவி சீரியல் கணக்கா லைனா ஆளாளுக்கு வரிசை கட்டி வந்து சீனுக்கு சீன் திருப்பம் தர்றோம்னு காமெடி செய்யற காமெடிய காண சகிக்க கண் கோடி வேண்டும்.

விஜய் ஆண்டனி நடிக்க போயிட்டதினால பாட்டு போடறதில சுரத்தில்லாம இருக்காரு போல.. பாலசுப்ரமணியத்தின் ஒளிப்பதிவு பளிச்.. தனுஷுக்கு இந்த மாதிரி படங்கள் தேவையில்லை என்றே தோன்றுகிறது.

உத்தமபுத்திரன் - சோப்ளாங்கி

கேபிள் சங்கர்