நடுநிசி நாய்கள்.

விண்ணைத்தாண்டி வருவாயாவுக்கு பிறகு கெளதம் வாசுதேவ் மேனனின் இயக்கதில் மிகுந்த எதிர்ப்பார்ப்பை ஏற்படுத்தியிருந்த படம். உலகக் கோப்பைக்கு ஒரு நாள் முன்னதாக வெளியாகியிருக்கிறது. படம் உலகக் கோப்பையை எதிர்கொள்ளுமா? மக்களின் எதிர்பார்ப்பை திருப்தி படுத்துமா? என்பது போன்ற பல கேள்விகளை எழுப்பியிருக்கும் படம்.

படத்தின் முதல் காட்சியில் ஒரு துப்பாக்கி வெடிக்கிறது. ஹைஸ்பீடில் ஒரு போலீஸ்காரர் மடேலென.. தண்ணீரில் விழுகிறார். லைப் லைன் ஹாஸ்பிட்டலில் ஒரு போலீஸ்காரருக்கு தன் சக போலீஸ்காரர்கள் கொல்லப்பட்டிருப்பது தெரிவிக்கப்படுகிறது. அப்போது அவர் சொல்கிறார். அந்த பொண்ணு இந்த ஹாஸ்ப்பிடல்லதான் இருக்கு. அங்க ஒரு பையன் இருப்பானே? என்கிறார். ஹாஸ்பிட்டலுக்கு போலீஸ் அஸிஸ்டெண்ட் கமிஷனர் வருகிறார். அவரிடம் டாக்டர் என்ன நடக்கிறது என்று கேட்கிறார்?. போலீஸ்னு சொல்லிட்டு ஒருத்தன் அந்த பொண்ணை கடத்திட்டு போயிட்டான் என்று புலம்புகிறார். அஸிஸ்டெண்ட் கமிஷனர் கையில் கிடைத்த ஒரு சத்யம் தியேட்டர் டிக்கெட்டிலிருந்து விசாரணையை ஆரம்பிக்கிறார். நடு நடுவே கடத்தப்பட்ட பெண்ணைப் பற்றிய செய்திகள் பேட்ரோல் போலீஸ் தகவல் கொடுக்க, என்று இப்படி பரபரப்பாகத்தான் ஆரம்பிக்கிறது. யார் போலீஸ்காரர்களை கொன்றது? கடத்தப்பட்ட பெண் யார்? அவளுக்கும் கொலையாளிக்குமான சம்மந்தம் என்ன? அவள் காப்பாற்றப்பட்டாளா? என்பது போன்ற வைட்டலான கேள்விகளுக்கு வெண் திரை பதில் சொல்லும்.

ஒரு விஷயத்தில் கெளதமை பாராட்ட வேண்டும். பாடல்களுக்காகவே முக்யத்துவம் பெரும் படங்களை இயக்கியவர். பாடல்கள் இல்லாமல், பின்னணியிசை இல்லாமல் ஒரு படத்தை அதுவும் த்ரில்லர் படத்தை அளிப்பதற்கு தைரியம் வேண்டும். பீராவாக வரும் வீராவின் நடிப்பு நன்றாக இருந்தது.  படத்தில் விரல் விட்டு எண்ணக்கூடிய அளவிலேயே நடிகர்கள் இருப்பதால் ஒவ்வொருவரும் தங்கள் வேலையை செவ்வனே செய்திருக்கிறார்கள்.

காணாமல் போன பெண் கேரக்டரில் சமீரா ரெட்டி. படம் முழுக்க ஒரு விதமான பயத்தோடு அலையவேண்டியிருப்பதால் கிட்டத்தட்ட ஒரே ரியாக்‌ஷன். மற்றும் டப்பிங் ஆர்டிஸ்டின் ஒரே விதமான மாடுலேஷனில் வரும் அலறல்கள். ஆங்காங்கு வரும் நச் முத்தங்கள் இதம். ஆனாலும் ரொம்பவே முத்திப் போய் தெரிகிறார்.

மனோஜ் பரமஹம்சாவின் ஒளிப்பதிவு படத்திற்கு மிகப் பெரிய பலம். பெரும்பாலும் இரவு நேரங்களிலேயெ படமாக்கப்பட்டிருப்பதால் ஒரு விதமான த்ரில்லிங் எபெக்ட்களை ஒளிப்பதிவு நிறைய விஷயங்களை கன்வே செய்கிறது. க்ளைமாக்ஸ் மழைக் காட்சியும், அதன் பிறகு நடக்கும் சம்பவங்களுக்கும் மனோஜ் ஒரு பெரி அசெட்.
எழுதி இயக்கியவர் கெளதம் வாசுதேவ் மேனன். வழக்கமான டெம்ப்ளேட் கதைகளை எடுப்பதற்கு பதிலாய் வித்யாசமான முயற்சிக்கு வாழ்த்துக்கள். இடைவேளையின் போது மீனாட்சியம்மா கேரக்டரின் இன்னொரு முகத்தை காட்டும் போது திடுக்கிட வைக்கிறார். ஒரு சைக்கோ கொலையாளியை பற்றி ஆங்கில படங்களை பார்த்தவர்களுக்கு இப்படம் ஒரு பெரிய இம்பாக்டை கொடுக்காமல் போகக்கூடிய வாய்ப்பு அதிகம். முதல் பாதி கொஞ்சம் பார்வையாளனின் ஸ்பெகுலேஷனிலேயே இருப்பதால் சோர்வடையச் செய்கிறது. க்ளைமாக்ஸ் நெருங்க..நெருங்க ப்ரபரப்பாக ஓடுகிறது. ஆனால் என்ன தான் வித்யாசமான படம் என்று எடுத்தாலும் திரைக்கதை ரெம்பவும் டெம்ப்ளேட்டாய் இருப்பது பொறுமையை சோதிக்கிறது, மூக்கை சிந்துவது போன்ற ரியாக்‌ஷன்கள், அந்நியன் போன்ற ஒரு ஸ்பிலிட் பெர்சனாலிட்டி கேஸ் என்று பார்க்கும் போது சுவாரஸ்யம் மேலும் குறையத்தான் செய்கிறது. காட்சிகளை விரிவாக பேசுகிறேன் என்று எல்லாக் காட்சிகளையும், உங்களுக்கு கிடைக்கக்கூடிய இனிய அதிர்ச்சிகளையும் எழுதி பாழ் செய்ய விருப்பமில்லை. மீண்டும் டெக்னிக்கலி ஒரு அருமையான படத்தை அளித்திருக்கிறார்.

சிறு வயதில் பாலியல் கொடுமை பெண் குழந்தைகளுக்கு மட்டுமல்ல, ஆண் குழந்தைகளுக்கும் உண்டு என்பதை சொல்லியிருக்கிறார்கள். ஆனால் திரைக்கதை பையனின் பார்வையில் இருப்பதால், ஒரு தேடல் இல்லாத திரைக்கதையாய் அமைந்துவிட்டது. அய்யோ பாவம் என்கிற மனப்பான்மை அவனை பார்த்து வர மாட்டேனென்கிறது. இதே கதையை ஹீரோயின் பாய்ண்டாப்வீயூவில் சொல்ல ஆரம்பித்து, அதில் ஹீரோவின் கதையை விளக்கியிருந்தால் சுவாரஸ்யமாய் இருந்திருக்குமோ? படம் கொஞ்சம் ப்ளாட்டாக இருப்பதை சொல்லாமல் இருக்க முடியவில்லை.  நிறைய இடங்களில் லாஜிக் இல்லவேயில்லை. சிகப்பு ரோஜாக்களில் ஒரு அருமையான காதல் இருக்கும்.அது படத்தின் பல இடங்களை காப்பாற்றும். த்ரில்லர் படம் என்கிற கேட்டகிரியில் படத்தை எடுத்திருந்தாலும், த்ரில்லாய் பெரிதும் ஏதும் இல்லாதது குறையே..

நடுநிசி நாய்கள் - ஓகே-- முயற்சிக்காக..

சங்கர் நாராயண் @கேபிள் சங்கர்

---

Post a Comment