சினிமா வியாபாரம்-2-12- Dolby Digital

பகுதி12
  அந்த பெரிய படம் என்ன என்பதற்கு முன்னால் ஒரு விஷயத்தை உறுதிப்படுத்த விரும்புகிறேன். தமிழின் முதல் டால்பி டிஜிட்டல் படம் கமலின் “குருதிப்புனல்” தான் என்பதில் ஐயமே வேண்டாம். டால்பி டிஜிட்டலுக்கும், டி.டி.எஸ்சுக்கும் வித்யாசம் தெரியாத அறிவிலிகளுக்கும், முட்டாள்தனமான மூர்கர்களுக்கும் நான் பதில் சொல்ல விரும்பவில்லை என்றாலும் தகவல் பிழை என்பது சாதாரண விஷயமில்லை. ஒரு தகவலில் பிழை சொல்ல வேண்டுமென்றால் அதைப் பற்றி அடிப்படை அறிவாவது வேண்டும். சரி விடுங்கள் நாம் அடுத்த கட்டத்தை நோக்கி நகர்வோம்.

தமிழின் முதல் டால்பி டிஜிட்டல் படத்திற்கு காரணமான கமல், அபிராமி ராமநாதன், ஏவிஎம் இராஜேஸ்வரி, தேவி தியேட்டர் உரிமையாளர்கள் தான் காரணம் என்பதை வரலாறு சொல்லும். அதை யாரும் மறுக்க முடியாது.

ஆனால் அதே நேரத்தில் இன்னொரு கம்பெனி தன்னுடய புதிய டெக்னாலஜியுடன் களமிறங்கியது. அதுதான் டி.டி.எஸ். டால்பிக்கு போட்டித் தயாரிப்பு. திரைப்படக் கல்லூரி மாணவர்களை வெளிச்சத்துக்கு கொண்டு வந்த ஆபாவாணன் தான் தமிழ் திரையுலகத்திற்கு டி.டி.எஸ் ஐ அறிமுகப்படுத்தியற்கு காரணமானவர். இவரது கருப்பு ரோஜா என்கிற படம் தான் தமிழின் முதல் டி.டி.எஸ்.படம்.

குருதிப்புனல் வந்த போது கமல் மற்றும் ஒரிரு தியேட்டர் அதிபர்கள் இணைந்து அந்த தொழில் நுட்பத்தை தங்களது தியேட்டர்களில் அளித்தது போல, டி.டி.எஸ் தொழில் நுட்பத்தை தியேட்டர் அதிபர்களுடன இணைந்து உடனடியாய் ஆபாவாணனால் கொண்டு வர முடியவில்லை. அப்படத்தின் பர்ஸ்ட் காப்பி ரெடி செய்வதற்கே பெரும் கஷ்டப்பட்டுக் கொண்டிருந்த நேரத்தில் அவருக்கு நேரமில்லை என்றே சொல்ல வேண்டும்.

அதே போல குருதிப்புனலுக்கு மூன்று தியேட்டர்கள் இருந்ததைப் போல அப்படத்திற்கு டி.டி.எஸ் நிர்மாணிக்கப்பட்ட தியேட்டர்களும் இல்லை என்றே சொல்ல வேண்டும். அந்தப் படம் ரிலீசான போது ஒரே ஒரு தியேட்டரில் மட்டும் டி.டி.எஸ் இருந்தாய் ஞாபகம். சரியாகத் தெரியவில்லை. அதனைப் பற்றிய தகவல்கள் கிடைக்கப் பெற்றால் தன்யனாவேன்.

டால்பி டிஜிட்டல், டி.டி.எஸ் இரண்டுமே இதுவரை வழக்கிலிருந்து அனலாக் எனப்படும் இடது, வலது பக்க ஒலியமைப்பை கொடுக்கும் டெக்னாலஜியிலிருந்து வலது, இடது, நடு, வலது நடு, இடது நடு, பின்பக்கம் என்கிற ஆறு சேனல் ஒலியமைப்பை 5.1 என்கிற பெயரில் ஒலியை பிரித்து கொடுக்கும் காரியத்தைத்தான் செய்தது என்றாலும், அதை வெளிக் கொணரும் முறையில்தான் இரு கம்பெனி டெக்னாலஜியில் உள்ள வித்யாசம். முதலில் இவைகளுக்குண்டான டெக்னாலஜியை பார்ப்போம்.

டால்பி லெபாரட்டரி என்கிற கம்பெனியின் ஆடியோ கம்ப்ரெஷன் டெக்னாலஜிதான் இந்த டால்பி ஸ்டிரீயோ என்கிற டால்பி டிஜிட்டல். இந்த டெக்னாலஜியின் முக்கியமான விஷயமே 35 எம்.எம் பிலிமோடு, டிஜிட்டல் சவுண்டை கொடுத்ததுதான். இதற்கு முன்னால் பிலிமில் வெறும் அனலாக் எனப்படும் வலது, இடது என்கிற நார்மல் மோடில் வந்து கொண்டிருந்த ஒலியமைப்பு, மெல்ல அடுத்த கட்டத்தை நோக்கி நகர ஆரம்பித்தது.
1992 ஆம் ஆண்டு வெளியான பாட்மேன் ரிட்டர்ன்ஸ் என்கிற படம் தான் முதன்முதலில் டால்பி டிஜிட்டலில் வெளியான படம். படத்தில் ஒலிகுறியீடுகளை, வீடியோ டேட்டாக்களாய் மாற்றப்பட்டு, பிலிம் ரோலில் உள்ள காதுகளுக்கு இடையே ப்ரிண்ட் செய்யப்பட்டது. சரி ஒலியை படச்சுருளுக்குள் ஏற்றியாகிவிட்டது எப்படி அது ஆறு சேனல்களாகப் பிரிந்து ஒலியைத் தரும்? அதற்கு ஒரு கருவியை அவர்கள் கண்டுபிடித்தார்கள். அதன் பெயர் பெண்ட் ஹவுஸ் என்பதாகும். அந்தப் படச்சுருள் ஓடும் ப்ரொஜெக்டரில் பெண்ட் ஹவுஸ் எனப்படும் அந்தக் கருவியை இணைத்துவிட்டால், பிலிமினுள் உள்ள வீடியோ டேட்டாவை, படித்து, 5.1 ஒலியாய் மாற்றித் தருகிறது. இதே இடத்தில் டால்பி ஸ்டிரீயோவுக்கான ட்ராக்குகளும் இருக்கும். அது எதற்கென்றால், தொடர் ஓட்டத்தினால் பிலிம்களில் உள்ள ட்ராக்குகள் தேய்ந்து, இடர்பாடு ஏற்படும் நேரத்தில் இதிலுள்ள அனலாக் எனப்படும் இடது, வலது ட்ராக்குகளை எடுத்து அதை ஸ்டீரியோவாக மாற்றி அந்த ஒலியமைப்பில் உள்ள் இரைச்சல்களை குறைத்து டால்பி ஸ்டீரியோ எனப்படும் டால்பி எஸ்.ஆர். முறையில் ஒலிபரப்பப்படும்.
மேலுள்ள படத்தில் பிலிம்களின் காதுகளுக்கு நடுவில் சாம்பல் நிறத்திலிருக்கும் இடத்தில் டால்பியின் சின்னத்தோடு இருப்பதில் தான் டால்பி ஒலியமைப்பு குறியீடுகளைச் சேமித்திருப்பார்கள். இந்தப்படச்சுருள் ப்ரொஜெக்டருடன் இணைக்கப்பட்டுள்ள பெண்ட் ஹவுஸ் ரீடருடன் சேர்ந்து இதிலுள்ள வீடியோ கோடட் டேட்டாக்களை படித்து, அதை ஆறு சேனல் ஒலிஅமைப்பாய் மாற்றி தருகிறது. அமெரிக்காவின் பெரும்பான்மையான தியேட்டர்களில் இன்றும் டால்பி டிஜிட்டல்தான் கோலோச்சுகிறது.

சங்கர் நாராயண் @கேபிள் சங்கர்