நஞ்சுபுரம்

ரொம்ப நாளாய் நஞ்சு பரவாமல் பெட்டியில் இருந்த படம். அதை இராமநாராயணன் தட்டி வெளிகொணர்ந்ததற்கு பாராட்டுக்கள். சின்னத்திரை புகழ் ராகவ் இசை, நடிப்பு, தயாரிப்பில் உருவான படம். பிரபல சின்னத்திரை இயக்குனர் சார்லஸ் இயக்கியபடம். முக்கியமாய் டிஜிட்டலில் எடுக்கப்பட்ட படம். இயக்குனர் ஒரு பதிவரும் கூட.

நஞ்சுபரம் எனும் ஊர் நான்கு பக்கங்களிலும் மலைகளாலும், நச்சுப் பாம்புகளாலும் சூழப்பட்டது. ஊரே பாம்பை பார்த்து பயந்து கொண்டிருக்க, அந்த ஊர் பெரியதனக்காரர் மகன் மட்டும் பாம்பைப் பார்த்து பயப்படாமல் இருக்கிறான். ஊர் கீழ் ஜாதி பெண்ணைக் காதலிக்கிறான். ஒரு நாள் நாகப்பாம்பை கொல்லாமல் விட்டு விட, அது திரும்ப வந்து பழிவாங்கும் என்ற நம்பிக்கையால் ஒரு பெரிய பரணைக்கட்டி அதில் அவனை உட்கார வைக்கிறார்கள். இதன் நடுவில் யாருக்கும் தெரியாமல் காதல், அவர்களுக்குள் கசமுச, கீழ் ஜாதி, மேல் ஜாதி, என்று பல விஷயங்கள் ஓட, நடுவே இவர்களது நம்பிக்கையும் சேர்ந்து பெரியதனக்காரன் மகன் கோழையாகிறான். எங்கே தான் பாம்பு கடித்து செத்துப் போவோமோ? என்று பயந்து, காதலியை பார்க்காமல் இருக்கிறான். அவனது பயம் தெளிந்ததா? காதலியுடன் அவன் சேர்ந்தானா? பாம்பு பழி வாங்கியதா?  என்பது போன்ற கேள்விகளுக்கு பதில் தியேட்டரில்.
ராகவ், மோனிகாவின் நடிப்பு நன்றாக இருக்கிறது. ஆனால் புதுசாக ஏதுமில்லை. மோனிகாவை பார்க, பார்க்க ரொம்பவும் பிடிக்க ஆரம்பித்துவிட்டது. க்யூட்.

சொல்ல வந்த விஷயம் நல்ல இண்டர்ஸ்டிங்கான விஷயம் தான். ஆனால் ஆங்காங்கே வரும்  பாடல்கள் பெரிய தடை கற்கள். சுவாரஸ்யமாய் கதை சொல்லும் போது பாட்டு வந்து இம்சை செய்கிறது.  படத்தில் பெரும்பாலான நடிகர்கள் புதுமுகங்களாகவும், டிவி சீரியல் ஆட்களாகவுமிருக்கிறார்கள்.  ஹெச்டிவியில் எடுக்கப்பட்ட படம். வெளிப்புற படப்பிடிப்பில் பல இடங்களில் வீடியோ ப்ளீச் இருந்தாலும் மிக நல்ல முயற்சி.. அதிலும் இரவு நேரக் காட்சிகளில் துல்லியம்.
பின்னணியிசை ஓகே. எழுதி இயக்கிய இயக்குனர் சார்லஸ் இம்மாதிரியான த்ரில்லர் கதைகளை எடுப்பதில் திறாமையானவர். கிடைத்ததை  வைத்து திறமையாக ப்ரெசெண்ட் செய்திருக்கிறார். இம்மாதிரியான படங்களுக்கு மிரட்டும் கிராபிக்ஸ் ஒர்க் சப்போர்ட் இருந்தால் இன்னமும் கொஞ்சம் பயமுறுத்தியிருக்கலாம். அதே போல் திரைக்கதையில் இருக்கும் லேக்கை கவனித்திருந்தால் சுறுசுறுப்பாயிருந்திருக்கும். பயம் தான் நஞ்சு என்பதை எட்டியிருக்கும் இடம் நச்.

நஞ்சுபுரம்- விஷம் இல்லை.

---

Post a Comment