பதிவாயிரம் -1000

பாண்ட் டவுன்லோட் இல்லாமல் தமிழில் இணையதளம் ஆரம்பிக்கலாம் என்ற எண்ணம் தோன்றி இணையத்தை தேடிய போது அகப்பட்டதுதான் வலைப்பூ உலகம். அப்படி முதல் முதலாய் படித்தது அந்நாளைய இணைய உலக பிரபலமான லக்கிலுக்கின் பதிவுதான். அவர் சைக்கிள் கற்றுக் கொண்டதை பற்றி எழுதிய ஒரு கட்டுரையை படித்துவிட்டு அவரின் மின்னஞசலுக்கு எழுதினேன். அப்போது தோன்றிய விஷயம்தான் வலைப்பூ ஆரம்பிப்பது என்று. ஆனால் அதற்குள் தமிழில் நாடகம்.காம் என்கிற பெயரில் இணையதளத்தை ஆரம்பித்தேன். அப்போது எனக்கு டிசைனிங்கில் உதவியவர் இன்றைய பிரபல பதிவர் ஹாலிவுட் பாலா. அப்போது வெறும் பாலாதான். அவர் பாதி டிசைனிங்கிலிருந்த போது எஸ்கேப்பாகிவிட,(அப்போது காணாமல் போனவரை கண்டுபிடித்து கொடுத்ததும் இந்த இணையம்தான்)  ஒரு மாதிரி தட்டுத் தடுமாறி நானே டிசைனிங்கை முடித்து ஒரு ஆறு மாதம் நடத்திவிட்டு மூடிவிட்டேன். அது ஏன் என்பது தனிக் கதை.

கலைஞர்களுக்கு( ஆனாலும் இம்சை தாங்கலைப்பா..) ஏதாவது ஒன்று போனால் இன்னொன்று என்று அரிப்பு இருக்குமே அதனால் என் எழுத்தார்வத்தை தீர்த்துக் கொள்ள 2006 ஆம் ஆண்டு அக்டோபர் 11 ஆம் தேதி என் முதல் பதிவை எழுதினேன். ஆரம்ப பரபரப்பில் எழுதிய பதினாறு பதிவுகளுக்கு பிறகு அப்படியே சுரத்து குறைந்து போயிற்று. அதற்கப்புறம் 2007ல் வெறும் எட்டு பதிவுகள். மீண்டும் பெரிய இடைவெளி உண்டாயிற்று. 2008 தான் மீண்டும் எழுத உட்கார்ந்தேன். இதற்கு இடைப்பட்ட வேலையில்  www.shortfilmindia.com  என்கிற பெயரில் ஒரு இணையதளத்தை நாடகம்.காமிற்கு முன்னாலேயே ஆரம்பித்து தொடர்ந்து நடத்தி வந்தேன். அச்சயமத்தில் தான் எனக்கு முதுகு வலி ப்ரச்சனை வந்து ரெஸ்ட் எடுக்க வேண்டியதாகிப் போக, பொழுது போக என்ன செய்வது என்று யோசித்த போது மீண்டும் ஞாபகம் வந்தது வலைப்பூ. எனவே இந்த இம்சைக்கெல்லாம் முதல் காரணம் என் முதுகு வலிதான்.

அதன் பிறகு நோ..லுக்கிங் பேக் என்றே சொல்ல வேண்டும். தொடர்ந்து எழுத ஆரம்பித்து இதோ ஆயிரம் பதிவுகள் வந்து விட்டது. ஆயிரம் பதிவுகள் என்ற சந்தோஷத்தை விட இந்த இணையத்தால் நான் அடைந்த பலனை நினைத்துப் பார்க்கும் போது சந்தோஷமாய் இருக்கிறது. முக்கியமாய் எனக்குள் இருந்த பல விஷயங்களை வெளிப்படுத்த ஒரு இடமாய் அமைந்ததும், அதன் மூலம் கிடைத்த பாராட்டுதல்களும், திட்டுக்களும் என்னை மேலும் செப்பனிட்டன.  சினிமாவைத் தவிர பெரிதாய் எழுதிப் பழகாத நான் இன்று நான்கு புத்தகங்களை எழுதிய எழுத்தாளன் என்றால் அதற்கு முழு முதற்காரணம் வலைப்பூதான்.

பதிவெழுத ஆரம்பித்த சில மாதங்களில் சில வருடங்களாய் காணாமல் போன என்னுடய வெப்சைட் டிசைனரான பாலாவை மட்டுமல்ல என்னுள் இருக்கும் இன்னொரு பக்கத்தையும் வெளிக் கொண்டு வந்தது இணையமே.என் துறை சார்ந்த மக்களிடம் என்னைக் கொண்டு போய் சேர்த்ததும் இந்த வலைப்பூதான். இதையெல்லாம் மீறி நான் இன்றளவும் சந்தோஷப்பட்டு துள்ளிக் குதித்து, உருகும் விஷயம் இந்த வலைப்பூக்களால் கிடைத்த நட்புகள். நட்பினால் கிடைக்கும் அன்பை, ஆதரவை, எனக்கு முழுசாய் உணர்த்தியது என் தந்தையின் மறைவு. எங்கிருந்து வரும் இவ்வளவு நட்பு?. ஏதாவது ஒரு ப்ரச்சனையோ சந்தோஷமோ, துக்கமோ உடனடியாய் பகிர்வது என்பது வலையுலக நட்புகளிடம்தான் என்றால் அது மிகையல்ல. இந்நட்பை பாராட்ட ஆயிரம் என்ன பல்லாயிரம் பதிவுகள் கூட எழுதலாம். இதுவரை தொடரும் உங்கள் ஆதரவுக்கும்.. மேலும் நீங்கள் என் மீது காட்டப் போகும் நட்பிற்கும் அன்பிற்கும் நன்றிகள் பல.