உலகின் சிறந்த இயக்குனர்கள்-2 மணிரத்னம்.

மணி சார்.. இப்படித்தான் தமிழ் திரையுலகில் மட்டுமல்ல இந்தியத் திரையுலகத்தினர் அனைவரும் அன்புடன் அழைக்கிறார்கள் மணிரத்தினம் அவர்களை. தமிழ் சினிமாவை இந்தியாவில் மட்டுமல்ல, உலகம் முழுவதும் உள்ள சினிமா ரசிகர்கள் அனைவரையும் திரும்பிப் பார்க்க வைத்தவர்களின் முக்கியமானவர் மணிசார். இவரின் படத்தில் நடிப்பதென்றால் இந்தியாவின் பெரிய நடிகர்கள் கூட சம்பளம், டேட் எல்லாவற்றையும் அட்ஜெஸ்ட் செய்ய தயார் என்று சொல்லுமளவுக்கு இவரின் மேல் மரியாதை. இவருடன் இணையும் தொழில்நுட்ப கலைஞர்கள், உடனடியாய் கவனிக்க பெறுவது இவரின் சிறப்பு.

எனக்கு இவரின் படங்கள் என்றாலே ஒரு விதமான ஜுரம் வந்துவிடும். நான் நிறைய முறை பார்த்த இயக்குனரின் படங்களில் இவரின் படங்கள் கொஞ்சம் அதிகம். இவரின் முதல் படத்திலிருந்தே நான் இவரது ரசிகன். ஆனால் இவரது முதல் படத்தை இவரது நான்காவது படத்திற்கு பிறகுதான் பார்த்தேன். அதில் வரும் அனில் கபூர் தமிழ் மெளனராகம் கார்த்திக்கின் ஒரிஜினல் என்று தெரிந்த போது இன்னும் அவரைப் பிடிக்க ஆரம்பித்தது. தமிழில் இவரது முதல் படம் பகல் நிலவு. அது வரை தடாலடியாய் நடித்துக் கொண்டிருந்த சத்யராஜை வித்யாசமான கேரக்டரில் அமைதியாக நடிக்க வைத்து அவருக்கு வேறொரு பரிமாணத்தை கொடுத்த படம். இப்படத்தில் சத்யராஜ் நடித்த போது அவர் மிகவும் நொந்து போய்விட்டாராம். ஏனென்றால் அதுவரை அவர் நடித்த படங்கள் எல்லாம் தகடு..தகடு என்று தடாலடி செய்து கொண்டிருந்த காலத்தில், கையைக் காலை அசைக்காமல் வெறும் பாடிலேங்குவேஜில் நடிப்பது மக்களிடம் தனக்குள்ள இமேஜை மாற்றிவிடுமோ என்று பயந்திருக்கிறார். இது பற்றி தயாரிப்பாளர் சத்யஜோதி தியாகராஜனிடம் முறையிட்டிருக்கிறார். அதற்கு அவர் தைரியமா நடிங்க.. நல்ல விஷயம் தெரிஞ்சவரு.. நல்லா வரும் என்று சொல்ல வேறு வழியில்லாமல் நானும் நிழல்கள் ரவியும் ஒரு முடிவு செய்தோம். ரவி கையை பின் பக்கம் கையை கட்டிக் கொண்டால், நான் முன்பக்கம் கை கட்டிக் கொள்வது, நான் பின்னால் என்றால் அவர் முன் பக்கம் என்று. ஆனால் படம் வெளியானதும் எங்கள் நடிப்புக்கு கிடைத்த வரவேற்ப்பை பார்த்ததும்தான் தெரிந்தது மணிரத்னத்தின் அபார திறமை என்றார். 

என்னா மனுஷன்யா.. எவ்வளவோ படங்களில் நடித்துவிட்டேன். ஆனாலும் இவரிடம் நடிக்கும் போது புதுசா இருக்கு.. இதைச் சொன்னவர் சூப்பர் ஸ்டார் ஷாருக்கான். பகல் நிலவு சுமாராய் போக, அடுத்ததாய் இவர் இயக்கியது இதயக்கோவில். இளையராஜாவின் சூப்பர் ஹிட் பாடல்கள் இந்தப்படத்தின் வெற்றிக்கு பலம் என்றாலும் வெற்றி என்று பெரிதாய் சொல்லிக் கொள்ள முடியவில்லை.   அடுத்ததாய் வந்த மெளனராகம் தமிழ் சினிமா உலகையும், ரசிகர்களையே திரும்பிப் பார்க்க வைதது. இப்படத்தைப் பற்றி ஒரு சுவாரஸ்யமான பேட்டி மணி கொடுத்திருந்தார். படததை முடித்தவுடன் இயக்குனர் மகேந்திரனிடம் உங்களது நெஞ்சத்தை கிள்ளாதே படத்தின் கதையைத்தான் நான் எடுத்திருக்கிறேன் பார்த்துவிட்டு சொல்லுங்கள் என்று படத்தை போட்டுக் காட்டியிருக்கிறார். படம் பார்த்துவிட்டு வந்த மகேந்திரன் இது என் கதையில்லை வேறு கதை என்று சொல்லி பாராட்டிவிட்டு சென்றாராம். இந்தியாவின் சிறந்த படமாய் தேசிய விருதுக்கு தேர்தெடுக்கப்பட்ட படமாய் அமைந்தது. இன்றளவில் இளையராஜாவின் பாடல்கள் இப்படத்தை கல்ட் கிளாஸிக்காக் நிறுத்தி வைத்திருக்கிறது என்றால் அது மிகையில்லை.

மெளன ராகத்திற்கு பிறகு வந்த நாயகன் திரைப்படம் தமிழ் திரையுலகில் ஒரு  பெரிய வெற்றியையும், திரைப்பட நுணுக்கங்களில் ஒரு புதிய மாற்றத்தையும் கொண்டு வந்தது. பின்னர் வந்த அக்னிநட்சத்திரம், தெலுங்கு கீதாஞ்சலி, அஞ்சலி, சூப்பர் ஸ்டார், மம்முட்டியின் தளபதி எல்லாம் அவரின் புகழ் மகுடத்திற்கு மேலும் ஒரு சிறகு என்றுதான் சொல்ல வேண்டும். முக்கியமாய்  தெலுங்கு கீதாஞ்சலி தான் மணிரத்னம் ஒரே கதையை மல்டிப்பிள் லேங்குவேஜில் எடுத்து வெற்றி பெற வழிவகுத்தப் படம்.  முக்கியமாய் தமிழ் திரையுலகின் முதல் கார்பரேட் கம்பெனியான ஜி.வி. பிலிம்ஸ் நிறுவனம் உதயமாக தளபதி படம் தான் காரணம் என்பதையும் சொல்ல வேண்டும். ரோஜா திரைப்படம் வெளிவந்த பிறகு மணிசாரின் பெயர் தமிழ் நாட்டிலிருந்து அகில இந்தியாவுக்கும் தெரிய ஆரம்பித்தது. அது நாள் வரை இளையராஜாவுடன் பணியாற்றி வந்தவர், புதிதாய் ரஹ்மான் என்ற இளைஞரின் இசையை அறிமுகப்படுத்த, அகில இந்தியாவும் தலையில் தூக்கி கொண்டாடிய இசையாய் அமைந்த்து இன்னொரு விஷயம். ரோஜா மணிசாரை வேறு ஒரு பரிமாணத்துக்கு கொண்டு சென்றது. பின்னர் வந்த திருடா திருடா தோல்விப்படமாய் அமைந்தாலும், இன்றளவில் ரஹ்மானின் சிறந்த இசைக்கு இந்தப் படமும் ஒரு உதாரணமாக அமைந்தது.

மும்பை குண்டு வெடிப்பை மையமாய் வைத்து அவர் தயாரித்து இயக்கிய பம்பாய் படம் பெரும் சர்ச்சையை உண்டு செய்தாலும் பெரிய வெற்றியை தமிழ், தெலுங்கு, இந்தி என்று எல்லா மொழிகளிலும் சூப்பர் ஹிட். அடுத்து வந்த இருவர், தமிழ் திரையுலகின் ஜாம்பவான்களான கலைஞர், எம்.ஜி.ஆரின் வாழ்ககையை ஒட்டி எடுக்கப்பட, இன்றளவில் விமர்சகர்களால் பாராட்டுப் பெற்ற படமாய் இருந்தாலும் தோல்வியை தழுவியது. அடுத்து மணிரத்னம் நேரடியாய் இயக்கிய தில்சே.. வும் ஒரு தோல்விப் படமாய் அமைந்தது. அந்தத் தோல்வியிலிருந்து வெளிவந்து வெறும் அரசியல் ப்ரச்சனைகளை சுற்றி வந்த கதைகளத்திலிருந்து ஆர்.செல்வராஜின் அருமையான கதையில் அலைபாயுதேவை தர, சூப்பர்ஹிட். அலைபாயுதேவில் ஒரு சுவாரஸ்யமான தகவல் உண்டு. அக்கதை ஏற்கனவே ஆர். சுந்தர்ராஜன் இயக்கத்தில் மோகன், அம்பிகா, எஸ்.வி.சேகர் நடித்த ”தூங்காத கண்ணின்று ஒன்று” என்ற படத்தின் கதைதான். அப்படம் வெற்றியடையவில்லை. அப்படத்தின் கதையை காதல், திருட்டுக் கல்யாணம், பிரிந்து வாழ்ந்தல் என்பதை மட்டுமே எடுத்துக் கொண்டு புதிய திரைக்கதையில் அடித்து தூள் கிளப்பியிருப்பார் மணிசார். அதனால் தான் அப்படத்தின் கதை ஆர்.செல்வராஜ் என்றிருக்கும்.
  அதன் பிறகு இயக்கிய கன்னத்தில் முத்தமிட்டால் பல சர்ச்சைகளையும், மாற்றுக் கருத்துக்களையும் ஏற்படுத்தினாலும், உலகின் பல விருதுகளை பெற்ற படமாய் விளங்கினாலும், கமர்ஷியலாய் ஒரு தோல்விப் படம் என்றளவில் தான் அப்படத்தின் முடிவு இருந்தது.  தமிழ், இந்தி என்று இரண்டு மொழிகளில் தயாரிக்கப்பட்ட ஆயுத எழுத்து இரண்டு மொழிகளிலும் தோல்வியை தழுவியது. திருபாய் அம்பானியின் கதையாய் சொல்லப்பட்ட குருவில் அவர் மீண்டெழுந்து வந்தார். கடைசியாய் அவர் அளித்த ராவணன். தமிழ் இந்தி இரண்டு மொழிகளிலும் தோல்விப்படமாய் அமைந்தது.  பின்னர் தமிழ் இந்தி, தெலுங்கு என்று மல்டி ஸ்டார்காஸ்டில் கல்கியின் பொன்னியின் செல்வனை ஆரம்பிக்க தலைப்பட்டு, அது பட்ஜெட்டினால் நிறுத்தப்பட்டதாக அறிவிக்கப்பட்டது. மீண்டும் ஒரு காதல் கதையை கொடுக்க தயாராகிக் கொண்டிருப்பதாய் செய்திகள் வந்த வண்ணமிருக்க, அவருடய முந்தைய படம் வெற்றியோ தோல்வியோ, சினிமா ஆர்வலர்கள், ரசிகர்கள் அவரின் அடுத்த படத்தைக் காண ஆவலாய் காத்துக் கொண்டுதானிருக்கிறார்கள். தமிழ் சினிமாவிற்கு மட்டுமில்லாது இந்திய சினிமாவிற்கே ஒரு புதிய பாதையை கொடுத்தவர் மணிரத்னம்.  மணி சாரின் வெற்றி, அவரின் படங்களின் வெற்றி தோல்விக்கு அப்பாற்பட்டதாய் ஆகிவிட்டது என்றே தோன்றுகிறது. என்னதான் காட்பாதரின் மறுபதிப்பு என்று சொல்லப்பட்டாலும் டைம்ஸ் இதழின் உலகின் 100 சிறந்த திரைப்படங்களில் நாயகன் என்கிற தமிழ் திரைப்படம் இடம் பெற வைத்த இயக்குனரை பாராட்டத்தான் வேண்டும். மணி சாரின் பிறந்தநாளான இன்று அவரின் அடுத்த படைப்பு வெற்றிபெற வாழ்த்துவோம்.

சங்கர் நாராயண் @கேபிள் சங்கர்

---

Post a Comment