Cable சங்கர்

அரசியல் கட்சித் தலைவர்களின் கருத்துக்களை நான் விமர்சனம் செய்தால் திமுக, அதிமுக போன்ற கட்சிகளை விட, பா.ம.க, சீமான் போன்றோரின் கட்சியில் உள்ளவர்கள் மிக மரியாதையாய் திட்டுவார்கள். நேற்று கூட பா.ம.க நிறுவனர் ராமதாஸ் எங்களோட யார் வேணா கூட்டணிக்கு வரலாம்னு சொன்னதை நான் காமெடின்னு சொல்லியிருந்தேன். அதுக்கு அவங்க கட்சிக் காரர் ஒருத்தர் பேஸ்புக்குல டேய்.. உன் மேல ரொம்ப மரியாதை வச்சிருக்கேண்டா என்று மரியாதையாய் எச்சரித்திருந்தார். வண்டலூர் மாநாடு அன்புமணிதான் தமிழகத்தின் எதிர்காலம் என்றிருக்கிறார். அவருடய முதல்வர் பதவியேற்பு வீடியோவை கலாய்த்து வேறொரு வீடியோ ஓடுகிறது. அதுக்கு என்ன சொல்வாங்களோ தெரியலை. அவருடய முதல்வர் பதவியேற்பு வீடியோவில் இன்னொரு விஷயத்தை சொல்லி அவர்களின் தொண்டர்களை பழக்கப்படுத்தலாம். அதாவது நானும் எனது கட்சி ஆதரவாளர்களும் சகிப்புத்தன்மையை பழக்கப்படுத்திக் கொள்வோம்ங்கிறதத்தான் சொன்னேன்.

திமுகவின் ஆட்சியாய் இருக்கும் பட்சத்தில் அம்மா.. அம்மா என்று ஆரம்பிக்கப்பட்ட பல திட்டங்கள் இல்லாது போகும். அம்மா உணவகம் பேரறிஞர் அண்ணா உணவகமாய் மாற வாய்ப்பு உண்டு. நிச்சயம். போன ஆட்சியில் அரசு மருத்துவமனையாய் மாறிய கட்டிடம் மீண்டும் தலைமை செயலகமாய் மாறும். அண்ணா நூலகம் சிறப்பாக இயங்கும். ஏற்கனவே அரை குறையாய் போடப்பட்ட ரோடுகள் மீண்டும் போடப்படும். கார்பரெஷன் கக்கூஸுகளின் காண்ட்ரேக்ட் மீண்டும் இம்முறை ஆட்சிக்கு வருகிறவர்களின் கைகளில் மாறும். அதிமுக ஆட்சியில் யாருக்கும் பெரிய அதிகாரமில்லை, நித்யகண்டம் பூர்ணாயுசு என்பது போல எப்போது வேண்டுமானாலும் பதவி போகலாம் என்ற நிலை இருக்கும். அது மாறும் கட்சியில் இருக்காது என்பதினால் பதவி கிடைத்தவர்களின் அதிகார ஆட்டம் அவரவர் ஏரியாக்களில் அதிகமாய் இருக்கும். போட்ட காசை எடுப்பதற்கு காசு வாங்கினாலும், நிச்சயம் வேலை நடக்கும்.  மேற் சொன்ன மாற்றங்கள் வேறு கட்சி ஆட்சிக்கு வந்தாலும் அஃதே சீரிய முறையில்  நடக்கும்.  கேபிள் சங்கர்

தேர்தல் ஜுரம் ஆரம்பமாகிவிட்டது. ஆளும் அரசு கட்டங்கடைசியாய் 110 விதிகளின் படி அறிவிப்பாய் விட்டுக் கொண்டிருக்கிறார்கள். என்ன ஏற்கனவே கொடுத்த அறிவிப்புகளின் நிலை எல்லோருக்கும் தெரியுமாதலால் யாரும் அதை சட்டை செய்ததாய் தெரியவில்லை. எதிர்கட்சியாய் இருப்பவர்களோ அதையே திரும்பத் திரும்பச் சொல்லி மக்களை ஏற்றி விட்டுக் கொண்டிருக்கிறார்கள். அப்படி சொல்வது ஒன்றும் தவறல்ல இவர்கள் ஆட்சிக்கு வந்து மீண்டும் அதே 110 விதியை பின்பற்றாமல் இருக்க வேண்டும். ஏனென்றால் ஒரு ஆட்சியில் தொடர்ந்த நல்லதை மீண்டும் தொடர்ந்த பழக்கம் நம் தமிழ்நாட்டு அரசியலில் இருந்ததே கிடையாது.

மதுவிலக்கு வரப் போகும் சட்டமன்ற தேர்தலில் ஆட்சி மாற்றம் நடந்தால் அதனால் நாட்டு மக்களுக்கு நடக்கப் போகும் முக்கிய மாற்றங்களைப் பற்றி ஊகிக்கலாமா? முதல் கையெழுத்தாக மதுவிலக்கு என்று சொல்லி வருகிறார்கள். திமுகவாக இருந்தால் ஒரு குறிப்பிட்ட தேதி சொல்லி அன்றிலிருந்து மதுவிலக்கு கொஞ்சம் கொஞ்சமாய் குறைக்கப்படும் என்று அறிவிப்பார்கள். மநகூ, பா.ம.க, எல்லாம் மாறி ஆட்சிக்கு வருவது என்பது நடக்காத காரியம் ஆனாலும், வாய்ப்பு கிடைத்தால் நிச்சயம் முதல் கையெழுத்தாக மது விலக்கை கொண்டு வர முயற்சிப்பார்கள். ஆனாலும் அது நடக்காது. அதிமுக, பா.ஜ.க இரண்டு பேரும் கூட்டணீ சேர்ந்தால் நிச்சயம் மதுவிலக்கு என்பதே கிடையாது. அடுத்த மாற்றம் பற்றி அப்புறம் பேசலாம். கேபிள் சங்கர்

திமுக - காங்கிரஸ் கூட்டணி உறுதியாகிவிட்டது. இணையமெங்கும் இனி தமிழீழம் கிடைக்காது. அது இது என்று ம.ந.கூ கூட்டம் ஒரு புறமும். முன்னாடி இப்படி பேசினியே இப்ப எங்க போய் மூஞ்சிய வச்சிப்ப? என்பது போன்ற ரீதியில் கேள்விகளாகவும் கேட்டுக் கொண்டிருக்கிறார்கள். என்னவோ இப்போது தான் தமிழ் அரசியலுக வரலாற்றில் முதல் முறையாய் போன கூட்டணியில் திட்டியவர்கள் ஒன்றாய் கூடி ஓட்டுக் கேட்க வருகிறார்ப் போல.. உதிர்ந்த ரோமம், என் அம்மாவுக்கு பொறக்கலை, துரோகத்தின் மொத்த வடிவம், என் குடும்பத்திலிருந்து யாராவது பதவிக்கு வந்தால் சாட்டைய எடுத்து அடியுங்கள் என்பது போன்ற வசனங்களையெல்லாம் கேட்டு, மறந்து ஓட்டுப் போட்டவர்கள் தான் நாம் என்பதையும் மறந்து கருத்து சொல்லிக் கொண்டேத்தானிருக்கிறோம். சமீபத்தில் ஒர் அதிமுக முக்கிய பிரமுகரிடமும், அவர்களின் பேரவை உறுப்பினருடனும் பேசிக் கொண்டிருந்தேன். அவர்களில் வெற்றி வாய்ப்பு எப்படியென? கூட்டணி தான் முடிவு செய்யும். ஏன்னா.. வெள்ளத்திற்கு முன்னாடி எங்களுக்கும் என்பது சதவிகிதம் என்றால் இப்போ ஐம்பதுக்கு ஐம்பது ஆகிவிட்டது என்று தோன்றுகிறது முக்கியமாய் திமுக+ காங்கிரஸ்+ தேமுதிக சேர்ந்தா...

கெத்து  படத்துக்கு ஒரு வழியாய் ஹைகோர்ட் வரிவிலக்கு அளிக்க சொல்லி உத்தரவிட்டது. ஆனால்  இப்படத்திற்கு வரி விலக்கு கொடுக்கக் கூடாது என்று போராடிய தமிழக அரசின் முனைப்பு பெரும் காமெடியானது. இதில் கட்டிய முனைப்பை மற்ற மக்கள் நல திட்டங்களுக்கு செலவழித்திருந்தால் நல்ல பேராவது கிடைத்திருக்கும்

க மல் ட்வீட்டருக்கு வந்திருக்கிறார். எல்லாருக்கும் வரும் ப்ரச்சனைப் போலவே ஆரம்ப கால ட்வீட்டர் பழக்கமில்லாமையும், தமிழ் தட்டச்சு ப்ரச்சனையும் அவருக்கு இருக்கிறது. ரெண்டு நாள் முன்னால் வெற்றிமாறன் என்பதற்கு பதிலாய் மணி மாறன் என்று டைப்படித்துவிட்டார். இதாண்டா சாக்கு என்று ஆளாளுக்கு ஓட்ட ஆரம்பிக்க, சில மணி நேரங்கள் கழித்து தன் தவறை உணர்ந்து கீ போர்ட் ப்ரச்சனை என்று புளுகினால் ஏன் என்று கேட்கக்கூட மாட்டார்கள் அப்படியிருந்தும், அது கீ போர்ட் தவறல்ல என் தவறுதான் என்று ஒத்துக் கொண்டு தான் மனுஷன் என்று நிருபித்துவிட்டார். ஆர்மபக் காலங்களில் இருந்து இன்று வரை விடாமல் ஸ்பெல்லிங் மிஸ்டேக்கோடு எழுதுவது ஸ்டைல் என்று எழுதுபவர்கள் இருக்கிறவர்கள் உலகமடா இந்த இணைய உலகம்.