கொத்து பரோட்டா 2.0-48

Trapped

நூரிக்கு மூன்று வாரங்களில் திருமணம் நிச்சயக்கப்பட்ட நிலையில் செளரியாவுக்கும், நூரிக்குமிடையே காதல். பாய்ஸ் ஆஸ்டலில் வசிக்கும் செளரியாவிடம் என் வீட்டை விட்டு வந்தால் நாம் எங்கு தங்குவது. பாஸ் ஆஸ்டலிலா?” என்று கேட்க, உடனடியாய் வீடு பார்க்கிறேன் என்று பார்க்கிறான். ரெண்டு நாளில் நூரியின் திருமணம் இருக்க, மும்பையின் அவுட்ஸ்கர்ட்டில் காலியாய் உள்ள முப்பது மாடி குடியிருப்பில் ஒரு வீடு கிடைக்கிறது.. அந்த பில்டிங் கோர்ட் கேஸில் இருப்பதால் இன்னும் யாருக்கும் குடி புக அனுமதியில்லை. ஒரு செவிட்டு வாட்ச்மேனைத் தவிர வேறொருவரும் இல்லாத அந்த ப்ளாட்டில் ராவோடு ராவாக அந்த வீட்டில் அவன் குடி புகுகிறான். அடுத்தநாள் காலையில் அவசரத்தில் கிளம்பும் போது போனை அறையில் விட்டு வர, ஆட்டோமேடிக் டோரில் சாவியை வைத்துவிட்டு எடுக்கப் போகிறான். காற்றில் கதவு மூடிக் கொள்ள அந்த வீட்டினுள் மாட்டிக் கொள்கிறான். கரண்ட், தண்ணீர் என எதுவுமில்லாத நிலை. மொபைலில் பேட்டரி இல்லை. இப்படி பல இல்லை.

கிட்டத்தட்ட என்பது சதவிகித படம் ஒர் அறையில் மட்டுமே சுழல்கிறது. செளரியாவாக நடித்த ராஜ்குமார் ராவின் நடிப்பு அட்டகாசம். ஆரம்பத்தில் கதவடைத்ததும் அடையும் பரபரப்பு. எப்படியும் உதவி கிடைத்துவிடும் என்கிற நம்பிக்கை கொஞ்சம் கொஞ்சமாய் தளர்ந்து போய் உடையும் குரலில் தெரியும் உணர்வுகள். கோபம். சுய பச்சாதாபம். க்ளாஸ்ட்ரோபோபிக் மனநிலை என மனிதன் பட்டையை கிளப்பியிருக்கிறார். இம்மாதிரியான படங்களைப் பார்த்தவர்களுக்கு இப்படத்தில் வரும் காட்சிகள் எல்லாம் ஒன்றும் புதிதாய் இருக்காது. என்றாலும் இந்திய அளவில் நல்ல தரமான முயற்சியே. படம் ஆரம்பித்த போது ஒவ்வொரு இரவையும் நாமும் கணக்கு பண்ணிக் கொண்டிருக்க, போகப் போக எத்தனை நாட்கள் என்று கணக்கு மறந்து போகும் அளவிற்கு நம்மை ஒன்ற வைத்துவிடுகிறது படம். படத்தின் மையமான விஷயத்தைப் பற்றி சில லாஜிக் விஷயங்கள் மனதில் ஓடினாலும் க்ரிப்பிங் எக்ஸ்பீரியன்ஸைக் கொடுக்கும் படம்.

@@@@@@@@@@@@@@@@@@@@@@@@@@@

ஓவியா ஆரவின் மருத்துவ முத்தம் பற்றித்தான் போன வாரம் பூராவும் பேச்சாய் இருந்தது. பல முத்தங்களின் நாயகன் பெயரிட்ட முத்தம். கிஸ்ஸடிச்சதுக்கு எல்லாம் லவ் பண்ண முடியுமா? என்று ஒரு சிறிய க்ரூப் ஆரவுக்கும், எங்க தங்க தலைவியை ஏமாத்தின ஆரவை வெளியேற்று என்று ஓவியா கொலைவெறிப்படை எனும் பெருங்கூட்டம் இணையமெங்கும் கத்திக் கொண்டிருக்கிறது. இம்மாதிரியான விஷயங்கள் எல்லாம் எப்படி நடக்கும் முழுக்க முழுக்க நாடகம் அதுவும் இத்தனை பேர் கேமரா எல்லாம் இருக்குமிடத்தில்? என்று கேள்வி எழுப்புவோரும் இருக்கத்தான் செய்கிறார்கள். இத்தனை கேமரா ஆட்கள் இருக்குமிடத்தில்தான் ஒருவரைப் பற்றி இன்னொருவர் புறம் பேசுகிறார்கள். வன்மம் கொண்டு திட்டுகிறார்கள், க்ரூப் சேர்க்கிறார்கள். இப்படி எல்லாமே நடக்கும் போது கிஸ்ஸடிப்பது மட்டும் எப்படி நடக்காது.அதும் தம் ரூமுக்குள் நம்மூரில் மட்டுமே கேமரா போகவில்லை. அல்லது காட்டப்படவில்லை. ஒரு ஆண் ஒரு பெண்ணை இப்படி டீஸ் செய்தால் எப்படி ஸ்டாக்கிங் அது இது என்று சொல்லுவோம் அதையே ஒரு பெண் இங்கே பண்ணிக் கொண்டிருக்கிறாள் அதை யாரும் கேள்வி கூட கேட்க மாட்டேன் என்கிறார்கள் என்ற பேச்சும் ஓடுகிறது. நான் சென்ற வாரம் சொன்னது போலவே தெலுங்கில் இன்னும் கொஞ்சம் போல்டாக நிகழ்வுகளை நடத்துகிறார்கள் சென்ற வாரம் நாமினேஷனை தனியரையில் கூப்பிட்டு சொல்லச் சொல்லாமல் நேரடியாய் சம்பந்தப்பட்டவரின் முகத்தில் கேக் கீரிமை அடித்து சொல்லச் சொன்னார்கள். செம்ம சூடாய் போய்க் கொண்டிருக்கிறது தெலுங்கு பிக் பாஸ். ஆனால் நம்மூரில் தற்போது பார்ப்பதை விட ஹிந்தியில் பத்து சீசன்களை கடந்து போயிருக்கும் பிக்பாஸில், சீட்டிங், ஸ்மூச்சிங், கிஸ்ஸிங், ரிலேஷன்ஷிப் ப்ரேக் என பல தடாலடி விஷயங்கள் நடந்தேறியிருக்கிறது. ஒரிஜினலான பிக் பிரதரில் மேட்டரே நடந்திருக்கிறது. நம்ம ஊருக்கு வர கொஞ்ச லேட்டாகும்.

@@@@@@@@@@@@@@@@@@@@@@@@@@@@@@@

ஒரு பிரபலமான பாரில் நண்பருடன் சந்திப்பு. பக்கத்து டேபிளில் டேபிள் நிறைய மல்லையாவின் ஒரு ப்ராண்டை மட்டுமே ஆர்டர் செய்திருந்தார் ஒருவர். நடுநடுவே ‘இவனுங்க எல்லாம் எதுக்கு குடிக்கிறானுங்க” என்று பொதுவாக திட்டிக் கொண்டேயிருந்தார். காதில் விழும் போதெல்லாம் கடுப்பாயிருந்தது. நண்பர் புகைக்க வெளிவந்த போது அவரும் அங்கே இருந்தார். நீங்க ஏனப்படி சொல்லிட்டேயிருக்கீங்க?’ என்று சற்றே கோபத்தோடு கேட்டேன்.  “பின்ன என்ன சார். ஒவ்வொரு ட்ரிங்கும் ஒவ்வொரு உணர்வு. ஒவ்வொன்னுத்தையும் எப்படி அனுபவிச்சு குடிக்கணும்னு ரூல் இருக்கு. அதை விட்டுட்டு ஒரு பெக்குக்கு அரை லிட்டர் கோக்கையோ, ஸ்பிரிட்டையோ ஊத்திட்டு குடிக்கிறது அராஜகம். இடியாடிக். என்றார் கோபத்துடன்.

“எப்படி சொல்றீங்க?”

”சிங்கிள் மால்ட், டபுள் மால்ட், இதைத்தவிர ஒவ்வொரு ட்ரிக்குலேயும் பல விதமான டேட்ஸ்டுகளைப் பத்தி போட்டிருப்பான் பாட்டில்ல அதை படிச்சிருக்கீங்களா?” என்றார். படித்த நியாபகம் வந்தது.

“அத்தனை டேஸ்டையும் அனுபவிக்க ஒவ்வொரு நிலை இருக்கு. முத முத நாக்குல பட்டதும் கிடைக்குற ஃபீல், உள் நாக்குல படும் போது, வாயில லேசா வலது பக்கம் ஒரு சுழற்று, இடது பக்கம் ஒரு சுழற்று சுழற்றி, மெல்ல தொண்டைக்கு அனுப்பும் போதுன்னு ஒவ்வொரு நிலையிலேயும் ஒரு டேஸ்டை பேஸ் பண்ணி தயாரிக்கிற மதுவைகள் இருக்கு. வெளிநாட்டுல ஒரு விஸ்கி இருக்கு வாயில் ஊத்தி லேசா ஒரு சுழற்று சுழற்றி களக்குனு முழுங்குனா ஐஸை முழுங்குறா மாதிரி இருக்கும் வாயைத் திறந்தா புகை வரும். அப்படியே எவாப்பரேட் ஆகும் இதை எதையும் தெரியாமல் எந்த சரக்கையும், கோக்கை ஊத்தி மடக்கு மடக்குனு குடிக்கிறவங்கலைப் பார்த்தா காண்டாவாது?:

எனக்கு அவரின் ஆதங்கம் புரிந்தது. நல்ல கோனியாக்கை, விஸ்கியை, ராவாக ஐஸ் போட்டு சிப்சிப்பாய் குடிப்பது ஒரு விதமான அழகு. எதைக் கொடுத்தாலும் பத்தலையே என்பது போல கண்களை இறுக்க மூடிஒரே மடக்கில் குடித்துவிட்டு, ம்ம்ம்.. கிர்.. என கர்ஜனையாய் குரலெடுத்து, அப்புறம் மாப்ள என்பது போல ஒரு லுக் விடுகிறவர்களைப் பார்த்தால் எனக்கும் கோபம் தான் வரும். ஆனாலும் இவரது கோபம் கொஞ்சம் அதிகமென்றே தோன்ற.. அதை சொன்னேன். அவர் சிரித்தார்.

“நானும் இங்க இருக்குற வரைக்கும் அப்படி குடிச்சவன் தான். இதுக்குன்னு கோர்ஸ் படிச்சேன் வெளிநாட்டுல எட்டு ஸ்டோர் வச்சிருக்கேன். எங்க ஸ்டோர்ல அரைலிட்டர் பாட்டிலுக்கு ரெண்டு லிட்டர் கோக் வாங்கிட்டு போறவன் நம்மூர் காரன் மட்டும்தான். வாழ்க்கைய அனுபவிக்க தெரியாம இருக்காங்க:” என்றபடி.. ஒவ்வொரு ப்ராண்ட் பேரைச் சொல்லி அதில் உள்ள  டேஸ்ட் எதனால் செய்யப்பட்டது என்று லிஸ்ட் போட்டுக் கொண்டே வந்தார். கேட்க கேட்க ஆச்சர்யமாக இருந்தது. ஒவ்வொன்றின் காம்பினேஷனும் பலவிதமான டேஸ்டுகளை கொடுக்கக் கூடியது. முடிக்கும் போது ஒர் வோட்கா ப்ராண்டை சொல்லி, இது உருளைக்கிழங்கை அடிப்படையாய் வைத்து தயாரிக்கப்பட்டது என்றார். என் எழுத்தாள நண்பருக்கு பிடித்த ப்ராண்ட். ”இல்லைங்க. அது உருளைக்கிழங்கு கிடையாது வேற ஒண்ணு” என்றேன். என் மறுத்தலிப்பு அவருக்கு பிடிக்கவில்லை. கையிலிருந்த சிகரட்டை அழுத்தமாய் உள்ளிழுத்ததைப் பார்க்கும் போது கோபம் தெரிந்தது. ஆழ இழுந்து புகையை கிட்டத்தட்ட முகத்தில்விட்டார். “நான் இதுக்காகவே படிச்சிருக்கேன்”

“இருக்கலாம் பட் ஸ்லிப் ஆப் த டங்கா தப்பாயிருக்கலாம். எனக்கு தெரிந்து அது உருளைக்கிழங்குல பண்றது இல்லை” என்றேன் மீண்டும். என் நண்பர் என் கையை அழுத்திப் பிடித்தார். அவரின் அழுத்ததில் வேணாம் விட்ரு என்று தெரிந்தது. பதில் சொல்லாமல் அமைதியாய் நின்றார். பாதி பிடித்து கொண்டிருந்த சிகரட்டை காலில் போட்டு நசுக்கிவிட்டு, உள்ளே சென்றார். சிறிது நேரம் கழித்து நான் உள்ளே சென்றேன். அங்கே அவரில்லை. பக்கத்து டேபிள் பாட்டிலை க்ளின் செய்ய வந்த பேரரிடம் எங்கே அவரு போய்ட்டாரா? என்று கேட்டேன்.. “ஆமா சார். பரபரன்னு உள்ளே வந்தாரு. அந்த ப்ராண்ட் வோட்கா பாட்டில் இருக்கானு கேட்டாரு. கொண்டு வந்து காட்டினேன். பாட்டில் மேல இருக்குறத உத்து உத்து படிச்சாரு. என்ன நினைச்சாரோ தெரியலை.. பாட்டில அப்படியே ஓப்பன் பண்ணி கடகடன்னு குடிச்சிட்டு கணக்கு கூட பாக்காம பணத்த வச்சிட்டு போய்ட்டாரு என்றார். அந்த பாட்டில் அவரின் டேபிள் மேல் இருக்க, எடுத்து படித்தேன். அது உருளைக்கிழங்கை அடிப்படையாய் வைத்து செய்யப்பட்டதல்ல.

@@@@@@@@@@@@@@@@@@@@@@@@@@@@@@@@@@@

Naked  short film

கல்கி கோல்சின் நடித்த குறும்படம்.அவர் ஒரு நடிகை. அவரை பேட்டிக் காண போகும் ஒர் பெண் பத்திரிக்கையாளர். முதல் நாள் இரவு நடிகையின் நிர்வாண வீடியோ வெளியாகி வைரலாகியிருக்க, பத்திரிக்கையின் எடிட்டர் நிருபரிடம் அதைப் பற்றி கேட்க சொல்கிறார். இவர் கேட்கிறா இல்லையா என்பதுதான் படம். கேட்டபின் சின்ன அறிவுரை சொல்கிறார்கள். பட்.. கிரிப்பிங்

https://www.youtube.com/watch?v=R29hoYjAF6w

---

Post a Comment